قليل من الرجال المحترمين : فالى فورج

 سنة 1777 الجيش القارى الامريكى بقيادة جورج واشنطن تراجع عشان يقضى فصل الشتاء فى مكان اسمه ( فالى فورج ) بعد سلسلة هزائم قدام البريطانيين مبقاش قدام قادة الجيش الا الانسحاب
و كان المفروض ان واشنطن يعسكر فى مكان بعيد و يدرب الجنود اللى اغلبهم مدنيين و مليشيات ضعيفة ( واشنطن شخصيا خبرته العسكرية كانت محدودة ) لمدة 6 شهور الشتاء استعدادا لهجوم على البريطانيين فى الربيع ...بس مفيش حاجة من دى حصلت

وصل واشنطن و 11 الف من جنوده و معاهمش ادنى اى اكل او علاج او حتى مكان ياويهم من البرد لدرجة ان اغلب العساكر مكانتش لابسة جذم اساسا و ماشيين فى التلج لما رجليهم بقت معلمة الطريق بالدم و اغلبهم متطوعين بعقود تنتهى بعد فترة قليلة و نفسهم يرجعوا بيوتهم
المرض و الجوع و البرد دمر معنويات الجيش و فقدوا 2000 جندى من عددهم و الباقى حالته اسود من السواد و اللى زاد الطين بلة ان الكونجرس اللى بيمثل الشعب الامريكى و مكلف واشنطن بالقيادة كان عايز يشيله بسبب مكائد من ناس ضده و مبعتوش الامدادات اللى اتفقوا معاه عليها

قدام الحالة الهباب دى و ضعف خبرة واشنطن و اعتباره ( ابن ناس و وطنى بس مهزوز ) كله تنبأ انه حيحل الجيش و يروح العساكر بيوتها و يهرب قبل ما البريطانين يشنقوه او يسلم نفسه ليهم و يطلب العفو

واشنطن عمل العكس و بين وش تانى , شغل قدراته الادارية مش العسكرية و عين 2 رجالة انقذوا فعليا امريكا

اولهم ناثانيال جرين و هو شاب مغامر جرئ كلفه واشنطن انه بأى شكل يدور على اكل و ملابس فى القرى اللى حوالين المعسكر و نجح جرين و ابتدت الامدادات توصل للجيش الامريكى و المعنويات ترتفع
اما التانى ضابط بروسى ( مقاطعة فى المانيا ) اسمه فريدريك فون ستيوبن و دا مسك تدريب العساكر و بخبرته العسكرية و انضباطه و ثقة الجنود ان اللى بيدربهم فاهم و عارف بيعمل ايه , الجيش اتعدل و واحدة واحدة اتحول من شوية مزارعين ببنادق صيد لجيش منظم متشوق يقابل البريطانيين تانى فى المعركة

الاتنين دول ريحوا دماغ واشنطن من مشاكل الاكل و التدريب و خلوه يتفرغ للحاجة اللى هو متفوق فيها , التخطيط لمعارك المستقبل

و قد كان , خرج الجيش الامريكى من معسكر فالى فورج سنة 1778 بعد الشتاء القاسى دا و هزموا البريطانيين بعدها باسبوع فى معركة مونماوث و استمروا فى القتال لحد النصر النهائى و استسلام الجيش البريطانى لواشنطن و جنوده

الزتونة :
لو واشنطن كان اختار جوز بهايم مكان جرين و ستيوبن لمجرد انهم ميسرقوش منه الاضواء كان زمانه متعلق على مشنقة و تاريخ العالم كاملا اتغير
فاما تختار نقى اللى يلحقك وقت شدة و لو اختلف عنك

و شكرا

اشكالية جوز الست : فيكتوريا و البرت

مساء الفل
اتربينا كرجالة شرقيين ان شريكة حياتنا متعديناش فى حاجة ، لا مال ولا مركز ولا حتى قوة بدنية و اللى بيخش فى علاقة من النوع دا بيتبصله بدونية او بتهكم باعتباره خيال مأتة مثلا
فما بالك بشاب 20 سنة اتجوز بنت قده فى السن و حكمت يوما ما ربع سكان الكوكب ؟؟؟

الحدوتة بسيطة ، سنة 1840 الامير البرت الالمانى اتجوز عن حب بنت عمه فيكتوريا ملكة بريطانيا ( العائلات المالكة فى اوروبا كانت بتتجوز من بعض فعادى ممكن تلاقى ملوك قرايب ) و اللى مسكت الحكم و هى حوالى 18 سنة و عديمة الخبرة و بالتالى كان طقم المستشارين بيحدفوها زى الكورة
و كانت ازمة البرت ان زوج ملكة بريطانيا مجرد تكملة للشكل الاجتماعى لكن فعليا ولا حاجة ، لا سلطة ولا منصب
البرت , المشهور بتعليمه الراقى و ديبلوماسيته , واحدة واحدة ابتدى ياخد من فيكتوريا ملفات محددة فى الدولة و يتابعها بهدوء و سلاسة و العملية مشيت معاه

فيكتوريا بما لها من عنطزة و جنان (الستات + الملوك + الانجليز ) كانت بتكره البرت و بتحبه بنفس العنف
الراجل اللى سحب جزء من سلطاتها كملكة برضاها و مش عايزة تاخدها تانى لانها ما صدقت ارتاحت و لقت حد يعتمد عليه
و معروف عنها ان كان بيجيلها نوبات غضب عنيفة و بالذات بعد ما حملت و هى طول عمرها بتكره الحمل و الرضاعة و بتعتبرهم سلوكيات ( شبيهة بالبقر ) و طبعا اثناء الحمل مفيش شغل و البرت كالعادة كان موجود عشان يشيل عنها فتتعصب اكتر
و مع ذلك انجبت فيكتوريا و البرت 9 اطفال فى 21 سنة زواج سعيد و كله راجع لذكاء و (تلامة) البرت

مثلا ، اثناء نوبات غضب فيكتوريا كان بيرفض يخشلها المكتب ، كان الاول بيحدفلها جوابات من تحت الباب و ترد عليه بالكتابة لحد ما تهدا و بعدين يتفاهموا , و ناس بتقول ان محتوى الرسائل كان خادش للحياء العام
بعد وفاة البرت المفاجأة بالتيفود سنة 1861 فضلت فيكتوريا لمدة 40 سنة لابسة اسود و دون زواج و اخدت كل ملابسه و ادواته و حطتها فى متحف ليه لوحده و ساعتها كانت اتعلمت ازاى تبقى ملكة و الامبراطورية البريطانية وصلت لاقصى اتساعها فى عصرها

الزتونة :
كلهن فى النهاية فيكتوريا اخى الكريم فاتعلم الشغل الصح و انت ترتاح باقى عمرك

و شكرا

النسور الضائعة : من كمين غابة تيوتبرج لكمين الزقدان

النهاردة صحينا على خبر مهبب هو الهجوم على كمين الزقدان فى وسط سيناء و استشهاد 12 جندى مصرى 

رغم النكد اللى احنا فيه بس نرجع و و نقول اللى مبياخدش عبرة من التاريخ بيكرره بالحرف 

فنسمع التاريخ بيقول ايه ( دا لو حد بيسمع اساسا ) :

سنة 9 قبل الميلاد فى حكم اوغسطس قيصر , كانت السيطرة الرومانية على جرمانيا ( المانيا الحالية ) مهزوزة على طول ...الارض مش معروفة و كلها غابات و القبائل الجرمانية معروفة بحبها للقتال و كراهيتها للرومان 

فكانوا بياخدوا من ابناء رؤساء القبائل رهاين يتعلموا فى روما و يرجعوا يمسكوا مكان ابهاتهم و يبقوا مواليين للدولة الرومانية و منهم شاب اسمه ارمينيوس اتعلم و اتدرب فى الجيش الرومانى و شارك معاه فى معارك و بعد كدا رجع بلده عشان يساعد الحاكم الرومانى بوليبوس فاروس

فاروس بالرغم من انه كان ادارى قدير و حاكم قوى لكن مكانش فاهم نفسية اللى بيحكمهم و زود عليهم الضرائب و اهانهم و اعتمد انه يمتلك 3 فيالق مجموعهم 25 الف جندى مدربين على اعلى مستوى قدام اقصى ما يمكن للجرمان جمعه 12 الف جندى و تسليحهم زى الزفت . ارمينيوس مستحملش اللى شافه من معامله الرومان لأهله , فهرب و ابتدى ثورة و جمع حواليه كل اللى مش طايقين الرومان

فى شهر سبتمبر , جه خبر لفاروس ان فى مدينة جرمانية اتمردت على الحكم و القوات الرومانية طالبة النجدة منه (الخبر دا كان كاذب ) , فقرر- دون اى استطلاع للطريق او لصحة الخبر - انه يحرك قواته كلها ناحية المدينة رغم ان جاله قائد جرمانى حليف و حذره ان فى كمين بيتعمله , لكن فاروس كان مغرور اكتر من انه يسمع لواحد همجى 

و كمل سكته عادى و دخل وسط غابة كثيفة اسمها ( غابة تيوتبرج )

القوات الرومانية المدربة على معارك فى مساحات واسعة لقت نفسها ماشية فى صف واحد وسط غابة متعرفش عنها اى حاجة 

و فجاة الجرمان بقيادة ارمينيوس ظهروا من وسط الاشجار و هجموا على الطابور من الجنبين و لما قاوم الرومان بعنف انسحب الجرمان و بعدها بكام دقيقة هجموا تانى و استمر الاستنزاف دا لمدة 3 ايام 

حاول الرومان يهربوا لبرة الغابة , الجرمان سدوا كل الطرق و اجبروهم على اللف فى دواير لحد ما دمروهم 

المعركة دى اتقتل فيها 20 الف جندى رومانى و فاروس و ضباطه انتحروا بدل الاسر و الباقى اتاخد عبيد او اتدبح فى طقوس وثنية جرمانية كقرابين للالهة و ضاعت 3 رايات عليها نسور ذهبية كانت رمز للجيش الرومانى و بيعتزوا بيها جدا

اينعم الرومان استرجعوا قواهم بعد كدا و هزموا الجرمان و استعادوا النسور كلها لكن غابة تيوتبرج بقت علامة سودا فى العسكرية الرومانية لدرجة ان اسامى الفيالق اتلغت من الجيش الرومانى عشان متفكرش الجنود باللى حصل

الزتونة : 

لو عدينا اخطاء فاروس مش حنلاقيها فى قوة السلاح او تدريب رجالته او حتى شجاعته الشخصية 

العيب فى التكبر و الاهمال و الاستهانة بالعدو اللى خلى شوية همج معاهمش الهدوم حتى يهزموهم بالشكل المهين دا

اظن الرسالة وصلت 

و شكرا

شنطة ماينرتزيهايجن

فى الحرب العالمية الاولى , حاول الحلفاء الهجوم على قطاع غزة فى شمال فلسطين لكن الاتراك كانوا عملوه قلعة و صدوا هجمتين للانجليز و مستعدين للصمود شهور 

فضل الوضع متجمد كدا لحد ما جه واحد انجليزى من اصل المانى اسمه الرائد ريتشارد ماينرتزيهايجن ( يخربيت اسمك يا جدع ) و كان عنده فكرة جديدة 

جاب شنطة جلد و ركب حصانه بلبس الجيش البريطانى الكامل و اتعمد انه يقرب من دورية تركية قرب مدينة بير سبع فى اقصى جنوب فلسطين و لما فتحوا عليه النار رمى الشنطة و تظاهر بالاصابة و خد حصانه و طلع يجرى 

الاتراك فتحوا الشنطة لقوا فيها ورق و خرائط بتقول ان الانجليز حيهاجموا قطاع غزة للمرة التالتة و حيشغلوا الاتراك بهجوم صغير على بير سبع 

و فضل الانجليز يبعتوا رسايل بالاسلكى لوحداتهم كلها توتر و بيأمروهم يلاقوا شنطة ماينرتزيهايجن بكل الطرق لان فيها ورق مهم و طبعا الاشارات دى قراها ضباط المخابرات التركية و الالمانية و اتأكدت المعلومات لما الاتراك اسروا 2 جنود بريطانيين و هم بيدوروا على الشنطة 

بعدها قائد القوات التركية اللى كان المانى ( بسبب قلة القادة الاتراك المدربين ) سحب كل قواته من بير سبع و بعتها قطاع غزة بعد ما تاكد ان المدينة معليهاش اى خطر و كام عسكرى يكفوا للدفاع عنها 

و ساعتها بدأ الجنرال البريطانى اللنبى (مش اللمبى عشان منخسرش بعض ) هجوم الحلفاء على مدينة بير سبع باغلب قواته و ساب قوة بريطانية صغيرة تزاول الاتراك فى قطاع غزة و ولما وقعت المدينة الاتراك فى غزة هربوا بعد ما وصلهم خبر الهزيمة و ان الانجليز شوية و يحاصروهم من كل الاتجاهات 

الزتونة : 

ان العقل شغال الايد متعطلش 

المصدر : كتاب ونستون تشيرشل و الخداع البريطانى 

الخريطة : الدوائر الحمراء الهجوم الرئيسى حتى بير سبع و السهم الاحمر الهجوم المخادع على قطاع غزة و السهم الاخضر اتمام حصار الاتراك و قطع طريق انسحابهم

الطف الكائنات : الفوج 1077 مضاد للطائرات

اثناء الحرب العالمية الثانية الاتحاد السوفيتى جند كل ما يمكن تجنيده عشان يصد اجتياح الالمان لاراضيه 
ولانه كان مش مستعد , الالمان دخلوا لعمق كبير جدا و وصلوا لمدينة اسمها ستالينجراد و دارت معركة طاحنة مكانش فيها ادنى شكل من الرحمة 
فى فوج , بمعنى فرقة جيش كانت معاها مدافع متنشنة فى السما و مخصصة للاشتباك مع الطائرات و مكونة بالكامل من البنات فى سن ثانوى و اولى كلية تقريبا و كانوا واخدين موقع جوة المدينة
الالمان خططوا لاحتلال الموقع دا و بعتوا اعداد كبيرة من الدبابات و قوات المشاة المدربة و فكروا ان حتبقى المقاومة محدودة لان مفيش دبابات او مشاة روس قدامهم
الفوج 1077 نزل فوهات المدافع بتاعته على اوطى ما يمكن و ضربوا على الدبابات الالمانية و لمدة يومين صمدوا و دمروا 83 دبابة , 15 عربة مدرعة و 14 طائرة و 3 كتايب جنود
قبل ما الالمان بحكم الكترة العددية يجتاحوا الموقع و يلاقوا جثث اللى كانوا مكفرينهم و كلهم بنات
الزتونة :
وقت ما بتتدربك لا بتفرق راجل من ست ..بيفرق فقط التدريب و الكفاءة و الشجاعة
فخلى اللى يهرى يهرى
و شكرا

ماذا استفدت من روبرت جرين ؟

للى ميعرفش روبرت جرين هو كاتب و مفكر استراتيجى و من الناس اللى بعتبرهم مثل اعلى 

الراجل دا اتنقع فعليا فى التاريخ عشان يطلع بحكم و ارشادات للحياة عموما و حطها فى كبسولات زى كتاب ( 33 استراتيجية للحرب ) اللى لما قريته استمتعت فعلا بكل صفحة و عرفنى ان قراءتى للتاريخ لازم تبقى بهدف انى اطلع حاجة تفيدنى فى حياتى مش ملى وقت او حفظ اسامى 

فلقيت مقال لاحد محبى روبرت جرين لخص فيه اهم افكاره فى النجاح فى العمل او الحياة او حتى الحرب و قلت اترجم شوية منها :

1- ( تجنب الجحيم التكتيكى ) ...ايه دا ؟؟؟ ...هو المكان اللى بتدفعك ليه رغبات الاخرين او عواطفك فقط بس مش مصلحتك نهائيا ...تفضل مزنوق تراضى و تطبطب و تستحمل عشان الناس لحد ما تقع من طولك و متحققش اى مكسب شخصى ....لو انت لسه على البر حكم عقلك مش عواطفك و ان اتورطت حارب بكل قوتك عشان تهرب منه 

2- ( انظر للنهاية قبل البدأ ) ...لازم تعرف اخر كل حاجة ايه ؟؟؟ .....بعد 10 سنين فى الوظيفة دى حبقى ايه ؟؟؟ ..بعد ما استفز الشخص دا , حقدر ادافع عن نفسى ؟؟؟ , لو انا خدت 10 جنية زيادة عشان انا المحل الوحيد اللى بيبيع سلعة معينة بس طلعت الزبون زعلان , لو بعد شهر فتح جنبى منافس بنفس السلعة , الزبون دا حيرجعلى تانى ؟؟؟....تبقى مختل لو ابتديت و عينك مش على النهاية 

3- (مارس التخيل السلبى ) ...و انت سعيد و منشكح كدا فكر لو مشروعك فشل ..اه و الله واتطربق على دماغك كدا ...لطمت ؟؟؟ ...اسأل نفسك بقى ايه السيناريو اللى اتخيلته لدمار مشروعك او فكرتك و ازاى وصلتله و ازاى تمنعه ..ساعتها حتبقى جاهز عقليا و نفسيا و ماديا لو حصلتلك نفس المشكلة اى يوم ..بس اوعى تتاخد على خوانة 

4 - (اتخذ الطريق غير المباشر ) ...دور على حلول جديدة , افتح سكك تناسبك لوحدك و متناسبش غيرك عشان تتجنب المنافسة و تاخد مجال جديد تلعلع و تبدع فيه ...لكن الطريق المباشر زى شارع ابوقير ..حتتحاصر بناس كتير و حتوصل بعد فوات الاوان 

5 - ( تقدم ببطئ و ادرس ارضك جيدا ) ...الجرى و السربعة قد يكون من فضائل عصرنا و كل ما تبقى متسربع اكتر كل ما الناس تقول عليك ناجح و نشيط , سؤال :حققت ايه و خسرت ايه لما جريت على كل حاجة بالسرعة دى و شتت مجهودك ؟؟؟ ...العقل بيقول , تقدم بشكل مستمر ...اوع تقف ...بس بص قدامك و انت ماشى و ركز فى حفرك و مطباتك عشان توصل سليم ....ادرس الطريق قبل ما تمشى فيه و اسأل عنه و شوفله صور من كل الاتجاهات ....لكن تنط بوشك كدا ؟؟؟ ...مرة تصيب و عشرة حتتشحور 

6- (دور على النقد ) ....كتير مننا اما يسمع اى نقد يزعل و يتقمص و يقولك مش لاعب و اعداء النجاح و الشجرة المثمرة بتتزقل بالطوب...جربت تسمع انت بتنتقد ليه ؟؟؟ ...عارف ان اللى على طول بيقولك شاطر مش مفيد قد اللى بيقولك عيوبك بصراحة و موضوعية ؟؟؟ ...امال حتطور نفسك ازاى يا بنى ادم ؟؟؟ و ياسلام لو عند مستشار خبير تطلب منه يطلع ثغرات شغلك عشان تلحق تقفلها قبل ما تتلاحظ و تلبس اسود ...هدى ال EGO شوية 

7- ( خليك سخى فى النجاح ) ...حققت هدفك و كل الناس بتبصلك و تكرمك ...اوع تقف و تقول ( انا كنت بعمل و بسوى و تعبت جدا و محدش وقف جنبى )...لا ...وزع نصرك على حبايبك و صحابك و مساعدينك ...( كلنا تعبنا , كلنا كسبنا , كلنا اتعاونا ) ...الانتصارات افضل مناسبة لكسب الاصدقاء مش جمع الغنائم ...حفز فريقك على قد ما تقدر حتمعل احلى نتايج المرة الجاية

8- ( اقبل الخسائر ) ...خسرت كام الف جنيه او اتهزقت من مديرى عشان محققتش التارجت ...اعيط و اصوت و استقيل ...باظت الخروجة ...لا انتوا مش صحابى و انا مش محبوب و بتاع ....ما انت لو فكرت و عرفت مثلا ان البلد فى حالة ركود و محدش بيشترى و كام يوم و الارقام تعلى تانى , او ان صحابك بيحبوك جدا و متخسرهمش عشان ظروفهم اتدربكت النهاردة ....حتعرف ان الخسارة مش على طول هزيمة ...اصبر و تحمل خسايرك طالما فى المقبول و اللى نفسه اطول على طول كسبان 

9- (ركز مجهودك و اعد التجميع ) ...دور على مركز هدفك و اتجه ليه ...متعدش تتنطط يمين و شمال و تضيع مجهود فى الهبل ...الشهادة دى هدفى ...كل الموارد و التركيز و الوقت يتخصص ليها ...العلاقة دى مهمة اوى ...نراعيها ...الشغل دا لو باظ حتعلق ...تركز فيه بكل قوتك....طب لو فشلت ؟؟؟ ...اتراجع و اعيد تجميع نفسى بسرعة و ارجع الملعب تانى ....لكن لا فيها هجمات انتحارية غير محسوبة ولا فيها انسحاب و قمص و غدر الصحاب ....ححاول لحد الاخر بس المرة الجاية حنشن صح 

10 - (حل مشاكلك بدرى )...تراكم المشاكل عموما بيكبرها ...شوف ايه سبب المشكلة و انهيه من جذوره ...اوع تتسامح مع مشكلة قاعدالك مستنيه لحظة اما تنفجر فيك 

دا تلخيص بس ...اللى حابب يقرا المقال كامل اهو 

http://thoughtcatalog.com/ryan-holiday/2016/08/29-lessons-from-the-greatest-strategic-minds-who-ever-lived-fought-or-lead/

و شكرا للى وصل لحد هنا 

ذكريات عربية : من عمر المختار لصبرا و شاتيلا

 16 سبتمبر ذكرتين صعبتين فى التاريخ العربى 

الاولى اعدام بطل ليبيا القومى عمر المختار سنة 1931 

و للجيل اللى مشافش الفيلم الشهير بتاع انتونى كوين , عمر المختار كان شيخ طريقة صوفية اسمها السنوسية و ليه هيبة و احترام فى ليبيا فقرر انه ينظم مقاومة ضد الاحتلال الايطالى 

اللى كان فعليا من اسوء عمليات الاستعمار فى التاريخ ....يعنى انجلترا بالنسبالهم ممرضات فى الصليب الاحمر 

عمر المختار لسعهم عدد من الهزائم لحد ما اضطر الايطاليين يعملوا خط اسلاك شائكة بطول الحدود المصرية الليبية بتكلفة مهولة عشان يمنعوه من شراء السلاح من مصر و انهم يدخلوا طائرات و دبابات فى صحراء ليبيا عشان يضربوا شوية بدو على حصنة شايلين بنادق معوقة 

لحد ما فى فى احد المعارك اتأسر و اعدم زى النهاردة 

و الخرنج اللى اعدمه , الجنرال جراتزيانى , يدور عليه الزمن و يتهزم قدام البريطانين و يهرب من ليبيا و جيشه اما يقع بالكامل فى الاسر يا ينضم لقوات روميل اللى جايين يدافعوا عن حلفاءهم (الولايا) 

اما الثانية مذبحة صبرا و شاتيلا سنة 1982 

اثناء الحرب الاهلية اللبنانية اسرائيل انتهزت الفرصة و غزت لبنان بس كان لازم شوية عملاء من اهل البلد يساعدوهم , فتبنوا مليشيا اسمها ( جيش لبنان الجنوبى ) بقيادة واحد من اوسخ شخصيات الارض , انطوان لحد , و كان الاتفاق بسيط حندلعكم فلوس و سلاح و نفوذ مقابل تدورولنا على الفلسطينين و عناصر المقاومة و تامنوا الوجود الاسرائيلى فى لبنان 

و قد كان , جيش لبنان الجنوبى بقيادة سعد حداد احد رجال لحد و شوية من مليشيات لبنان اللى من نفس عينته ( حزب حراس الارض و حزب الكتائب اللبنانية ) اقتحموا مخيم للاجئين الفلسطينين اسمه (صبرا و شاتيلا ) فى بيروت بدعوى البحث عن فدائيين و الجيش الاسرائيلى بقيادة ارييل شارون عمل حصار من برة و منع هروب اى حد او دخول اى حد للمخيم و عزله بالكامل عن العالم 

و دوروا الدبح فى الاهالى دون تفرقة لمدة ثلاث ايام و لما كانت الدنيا تليل الجيش الاسرائيلى ينور المخيم بالقنابل المضيئة عشان المذبحة تستمر 

الاعداد كانت حوالى 750 -3000 قتيل كتير منهم نساء و اطفال ( مفيش جهة عرفت تعد الجثث يومها بدقة بسبب ظروف الحرب ) و فى منهم اتقتل بالسلاح الابيض متعرفش توفير للذخيرة ولا اجرام ولا مرض نفسى ولا ايه 

و محدش اتحاسب ببصلة على اللى حصل حتى الان

النهاية بقى , تحت ضربات حزب الله انسحبت اسرائيل فجأة من جنوب لبنان و تسيب جيش لبنان الجنوبى لمصيره من غير ما تبلغه حتى انها ماشية و يهرب انطوان لحد و بعض من الحثالة اللى معاه لاسرائيل بعد توسل و حاليا عايشين هناك تلاحقهم لعنات كل الارواح اللى ازهقت بسببهم 

الزتونة : 

( لا تصالح

ولو توَّجوك بتاج الإمارة

كيف تخطو على جثة ابن أبيكَ..؟

وكيف تصير المليكَ..

على أوجهِ البهجة المستعارة؟

كيف تنظر في يد من صافحوك..

فلا تبصر الدم..

في كل كف؟

إن سهمًا أتاني من الخلف..

سوف يجيئك من ألف خلف

فالدم -الآن- صار وسامًا وشارة ) 

قصيدة لا تصالح لامل دنقل 

الصور : عمر المختار بعد القبض عليه 

مذبحة صبرا و شاتيلا

درس تكتيك

فى الحرب العالمية الثانية , سنة 1944 تحديدا 
الالمان احتلوا مساحات كبيرة من روسيا و كانت مليانة مدنيين , الالمان بدل ما يدلعوهم و يعوضوهم عن نشفان الشيوعية دوروا فيهم الدبح و البهدلة 
فظهرت مقاومة شعبية و بقت مهمتهم يضربوا الالمان فى ضهرهم , يعنى يعطلوا قطر , يقتلوا كام ظابط , يخربوا مخزن و الخ الخ 
و كانوا شغالين بمعدل خرافى لدرجة ان اتسجل 1000 عملية فى يوم واحد 

وسط المدعكة دى الالمان جالهم اخبار ان الجيش الروسى حيهاجم فى الجنوب فى خلال كام يوم فابتدوا يشحنوا قوات من وسط روسيا عشان يصدوهم
الالمان للعجب لقوا القطارات ماشية عادى , السكك الحديد متخربتش , مفيش ظابط اغتالته المقاومة , مفيش اى حاجة ...خالص...راحت فين المقاومة ؟؟ ..محدش يعرف و محدش سأل

القوات الالمانية اتجمعت باعداد كبيرة و استعدت لصد الهجوم الروسى على الجنوب و كله فل
اللى حصل ان الروس مهجموش فى الجنوب ....هجموا فى الوسط اللى فضى بالكامل
حاول الالمان يرجعوا قواتهم بالقطارات فى اسرع ما يكون
هنا ظهرت عناصر المقاومة و ضربت خطوط السكك الحديد و محدش عرف يرجع ينجد زمايله و القوات السوفيتية استفردت بمجموعة الوسط و كانت مصيبة
و اللى عرفوه متأخر ان المقاومة الشعبية كانت متصلة بالقوات الروسية مش شغاله ببركة دعا الوالدين و نسقوا الشلوت دا مع بعض من اول خبر الهجوم المزيف لحد ضرب القطارات الراجعة

الزتونة :
(ان رأيت عدوك منهمكا فى خطأ فلا تقاطعه )
و هنا الروس مقاطعهوش , دا ساعدوه كمان
و شكرا
المصدر : كتاب ( استراتيجية حرب العصابات السوفيتية فى الحرب العالمية الثانية )

شجرة العشم : عن ثورة وارسو

زى النهاردة 2 اكتوبر سنة 1944 , انتهت ثورة وارسو (عاصمة بولندا ) ضد الحكم الالمانى 

بس دى ليه حدوتة لوحدها 

البولنديين كانوا مخزنين كميات كبيرة من السلاح و مستنيين لحظة ضعف للقوات الالمانية 

و لحظة الضعف اللى مستنينها حصلت لما الجيش السوفيتى ابتدى يقرب من وارسو و كله فرح و قال ان هزيمة الالمان مسالة ايام و قرروا بداية الثورة عشان تساعد السوفيت و يبقى الالمان بين كماشة جوة و برة وارسو 

بحسبة صغيرة . عدد البولنديين المسلحين كان حوالى 50 الف فرد دا غير القوات السوفيتية اللى حتيجى تساعدهم اما عدد الالمان 25 الف فرد 

بالتالى البولندين حيعجنوهم لو خدوهم على خوانة 

الناس نزلت الشوارع و دورت القتل فى العساكر الالمان و المدينة طلعت برة السيطرة النازية بالكامل و الاهالى استنوا الرد الروسى 

الروس مردوش ...القوات السوفيتية وقفت برة وارسو تتفرج و رفضت التدخل فى اى حاجة بتحصل حتى المطار اللى استولوا عليه و على بعد 5 دقائق من المدينة بالطائرة رفضوا يطلعوا منه مقاتلات تساعد البولنديين 

الالمان استوعبوا الصدمة , جابوا قوات من حوالين وارسو و استدعوا الطيران و نزلوا طحن فى الثوار و بعد شهرين من القتال على مرأى و مسمع من الروس , الالمان انهوا ثورة وارسو و قتلوا 16 الف مسلح و حوالى 200 الف مدنى اغلبهم باعدام جماعى 

و اتدمرت ربع العاصمة و فى موجات الانتقام التالية دمر الالمان كمان 35% منها و بكدا تبقى وارسوا اتمسحت بنسبة 85% ان عرفنا ان الالمان اساسا ضربوها اما اتعمت فى بداية الحرب 

ليه الوساخة دى من الروس و مستافدوش من الثورة ليه و هجموا على المدينة و ساعدوا المقاومة ؟؟؟ 

ستالين شاف ان البولنديين بطبيعتهم شعب صلب و محارب و مش ميالين اوى للشيوعية فقال اما اسيبهم يتورطوا مع الالمان عشان يدبحوا بعض و لما اخش المدينة عاجلا ام اجلا ملاقيش فيها حد يزاولنى لا المان ولا شباب بولندى متحمس شايل سلاح 

الزتونة : 

شجرة العشم مبتتطرحش الا خوازيق 

و شكرا 

الصورة : استسلام المقاومة البولندية

الحالم الاخير : ارنستو تشى جيفارا

اولا كدا انا سارق عنوان المقال من قصة لاحمد خالد توفيق بس ملقيتش احسن منه  

النهاردة يوافق ذكرى اعدام واحد من اكبر علامات القرن العشرين , المناضل او الارهابى ( على حسب انت بتشجع مين ) ارنستو تشى جيفارا ....و تشى دا مش اسم حد من عيلته دا لقب بيتقال فى الارجنتين بلده , زى ما بنقول لاى عسكرى يا دفعة كدا 

حياة جيفارا كانت اختصارا حلم اى شاب يسارى , اتخرج فى كلية الطب و لف امريكا الجنوبية على عجلة , التحق بقوات الثورة الكوبية بقيادة فيديل كاسترو عشان يبتدوا ثورة فى بلد مش بلده بس الراجل كان عنده فكرة ( الجهاد العالمى ) و ( اينما وجد الظلم فهى بلدى ) و شغل الابطال الخارقين دا 

المهم الراجل حارب فى كوبا و انتصرت الثورة و الشيوعيين مسكوا الحكم و لقوا ان السياسة اصعب كتير من الحرب فى الغابات ...لازم تطاطى البصلة عشان تعيش مع جار عملاق مزعج زى امريكا و قد كان ...السياسة خلت الثوار المثاليين الحالمين يتقلبوا مجرد سياسيين مش عايزين وجع قلب 

و كانت صدمة لجيفارا العاطفى المتعلق بشعارات الحرية و الثورة فاتنازل عن الجنسية الكوبية فى رسالة مؤثرة لزمايله عشان يعفيهم من مسئولية اى عمل حيقوم بيه و شد الرحال يدور على مكان يحارب فيه الظلم و الاستبداد 

راح الكونغو الاهالى متقبلوش ان واحد ابيض اللى يساعدهم فى ثورتهم على اساس انهم مش هبل يعنى 

قام سحب نفسه و طلع على بوليفيا فى امريكا الجنوبية اللى كان فيها رئيس رمة مكفر سيئات الخلق بس مدعوم من امريكا 

هنا الامريكان مستنوش جيفارا يبتدى يقلب الناس على الراجل و يتكرر خازوق كوبا فبعتوا ( القبعات الخضراء Green berets ) و دول مجموعة من القوات الخاصة الامريكية المدربة على حرب العصابات و كانت مهمتها تدريب و مساعدة الجيش البوليفى ضد جيفارا و زملاءه 

و هنا واجه جيفارا تانى حلم يتطربق على دماغه , بس كان الاخير المرادى , الحكومة البوليفية بمعونة المخابرات الامريكية نجحت تكره الفلاحين الفقراء فيه بمسميات كتير ( ملحد - اجنبى - عميل ) او ببساطة ( حنفشخكم لو ساعدتوه ) و بالتالى فشل فى جمع انصار حواليه و الامدادات من سلاح و اكل موصلش و الاهالى بلغت عليه 

و الجيش حاصره تدريجيا لحد ما اتأسر و جه امر باعدامه زى النهاردة 9 \ 10 \ 1967 فى قرية ( لاهجيرا ) فى جبال بوليفيا و اتضرب بالرصاص فى كل حتة ما عدا دماغه عشان يسهل تعرف المخابرات الامريكية عليه بعد استلامه 

فى ناس بتقول ان اغبى قرار عملوه الامريكان انهم صوروا جثته عشان بقت ايقونة للكفاح ضدهم و ضد القراطيس اللى بيحطوهم على الكراسى حتى انهيار الحلم الشيوعى و ظهور ايقونات ( مختلفة ) للنضال ضد امريكا و بدقون برضه 

و بس كدا

ايام فاصلة : كربلاء

النهاردة بالهجرى حصلت معركة فعليا قلبت تاريخ المنطقة العربية و ممكن تبعاتها تكون اثرت على العالم كمان 

يوم 10 محرم ( عاشوراء ) سنة 61 هجريا , دارت معركة كربلاء اللى اتقتل فيها الحسين حفيد الرسول على يد يزيد بن معاوية ثانى الخلفاء الامويين

الموضوع يبدأ بعد اغتيال على ابن ابى طالب رابع الخلفاء الراشدين و الاختلاف على من سيخلفه لحد ما تولى معاوية ابن ابى سفيان الحكم بفرض الامر الواقع و عمل صلح مع الحسن بن على بن ابى طالب على اساس يرجع الحكم للحسن بعد وفاة معاوية منعا للمشاكل و تفريق الصف و ميبقاش فيها توريث زى ملوك الفرس و الروم 

لكن معاوية طمع فى الحكم لابنه يزيد و رجع فى كلامه و طلب من الكل يبايعه و لو بالعافية و منهم الحسين اخو الحسن اللى ليه ثقل و احترام كبير ( لان الحسن كان مات ساعتها ) , الحسين رفض و خرج من بيته فى المدينة و راح مكة و اعتصم هناك و الناس اتلمت حواليه و جاله طلبات من اهل الكوفة بالعراق انه يجى عشان يبايعوه خليفة بدل يزيد اللى كان سفاح بالوراثة و ساعتها ساب مكة و طلع باسرته على الكوفة عشان يلم الناس هناك و يحارب بيهم معاوية 

وصل الحسين الكوفة و ملقاش حد مستنيه , الناس كلها خلعت و كله انكر انه بايعه او كلمه و اتقاله الرد الخالد ( القلوب معك والسيوف مع بني أمية والقضاء بيد الله ) 

و مبقاش معاه الا 90 فرد من المخلصين ليه و عرضت قوات معاوية المكونة من 4000 فرد عليه الاستسلام فى منطقة كربلاء و الذهاب كأسير ليزيد فرفض و دارت منقدرش نقول عليها معركة لان دا اعدام بس بشوية خساير و اتقتل الحسين و ابنه الرضيع و اتبعتت راسه ليزيد ابن معاوية و اتأسرت اغلب اسرته و ان كان افرج عنها بعد كدا 

و هنا فى ناس فضلت على رفضها مبايعة يزيد و اعتبار ان الحكم لازم يرجع بيت الرسول ( الشيعة ) و ناس كملت فى البيعة ليزيد ( السنة ) و حتى الان الطرفين دول مبطلوش خلافات خصوصا بعد ما التشيع انتشر فى ايران 

حتى فى تذكرهم ليوم عاشوراء مختلفين ...الشيعة بيستقبلوه بالحزن على الحسين و مظاهرات جلد النفس ( حرفيا ) و السنة للغرابة بيعملوا فيه حلويات اسمها عاشورة رغم احترامهم الشديد للحسين و بيقال انها عادة دخلها صلاح الدين الايوبى لما حب يحول المصريين من الفكر الفاطمى الشيعى للفكر السنى فقالك بدل ما يعيطوا خليهم يعلموا عاشورة 

و شكرا 

ملاحظة : انا مش متخصص فى التاريخ الاسلامى فأى اى اخطاء تاريخية او دربكة ممكن اصلحها 

الصورة ، تخيل لمعركة كربلاء و باين فارق الاعداد بيت اتباع الحسين و جيش يزيد

تراث العبيد : المماليك و تأثيرهم على الوعى المصرى

كتاب دخل مخى و مش حيطلع للابد

( تراث العبيد فى حكم مصر المعاصرة ) 

الكتاب فى علم ( الاجتماع التاريخى ) بالبلدى يعنى تأثير احداث التاريخ على سلوك الشعوب

مثلا الفرنسيين احتلوا تونس فترة طويلة فالتوانسة حتى الان بيتكلموا فرنساوى زى العفاريت 

هنا بقى بيتكلم عن تأثير حكم المماليك على الشعب المصرى , ازاى لوحوا عقله و ادوله تراث كبير من السلوكيات المهببة 

الاول مين المماليك ؟؟ 

اطفال صغيرين اتخطفوا من جورجيا و ارمينيا و اتباعوا عبيد للايوبيين فى مصر اللى دربوهم على السلاح و علموهم و مسكوهم الجيوش ( عشان مكانوش عايزين جيش من اولاد البلد لان فى نظرهم مينفعوش للحرب و اخرهم الزراعة فقط ) و بعد كده المماليك مسكوا الحكم و دى اول مرة عبد يحكم احرار ...محصلتش فى التاريخ 

ازاى الناس دى كانت عايشة ؟؟؟ 

بالطول و بالعرض عملا بنظرية ( البلد اللى محدش يعرفك فيها ....) , لا اب و لا ام و لا اى حد و بالتالى : 

1- المماليك اعتادوا عمل المكايد لبعض و من هنا جت الفاظ زى ( زنبة , مهموز) ...كعبيد اغراب فى بلد غريبة كان لازم كل واحد يسعى لقلب الاستاذ و المالك بتاعه اى شكل ...طبعا كل واحد عارف فى الاشغال المصريين بيعملوا ايه فى بعض و العن من كدا فى الغربة ..قارن دا بباقى العرب صعب تلاقى تشابه 

2- كناس دون عائلات وسط شعب مرتبط بشكل هيستيرى بعيلته اغلب الشتايم اللى تبناها الحكم المملوكى كانت بالام او فيها ايحائات جنسية, هو بيشتم ام المصرى لان المصرى لو شتمه هو ميعرفش امه مين اساسا و بالتالى المصرى حيتجرح اكثر...اما الشتايم الجنسية الحالية اللى ممكن 

تستعجب ازاى راجل بيدعى الاستقامة الجنسية يشتم راجل زيه بيها حتلاقيها مش غريبة لو عرفنا ان المماليك اتمنعوا من الزواج حتى سن كبير و شاع بينهم المثلية بالتراضى او بالعنف ككسر عين و بالتالى المصرى اللى متعودش على ( الاباحة ) اتعلمها من وساخة و فجر المماليك

3- المملوك لما كان بيعجز كان السلطان بيديله قطعة ارض بالفلاحين اللى عليها يسترزق من ايرادها اسمها (طرخانة ) , المملوك كان بيركن فى قصره فى العاصمة و بيستنى الايراد دون ما يتابع او يحرك صباع واحد , يفكرك دا اللى باعوا املاكهم و مشاريعهم و ودوها لشركات توظيف الاموال عشان تديهم عائد كبير وهم قاعدين فى البيت.....اتغرس فى مخه ان الغنى او البيه لازم ميحطش ايده فى الشغل و يستنى الربح بس ...دا غير اقتصاد الاتاوات و الفردة و البلطجة و السلب من الفلاحين اللى كانوا عايشين عليها و يكفيك انك تبص لسايس جراجك و يبقى الكلام خلص 

4- المملوك كان اول ما يلبس السيف يبقى هو ( الحكومة ) و الباقيين ( اهالى ) , بيحكوا ان الضباط الاتراك كانوا اشد مخاليق ربنا ظلما و اهانة للمصريين لدرجة ضربهم ( بالافا ) دون اى سبب لمجرد دخولهم قسم الشرطة فى حين انه ولا يلمس المذنب الاجنبى ...الغريب بقى ازاى التراث دا اتنقل للمصريين و بقوا يعملوا فى بعض اللى اجدادهم اتعذبوا بيه

5- المماليك اشتهروا بالغدر ببعض و كراهية انهم يشوفوا واحد ناجح و كتير من سلاطين المماليك اتقتلوا فى عز انتصاراتهم , الاشرف بن قلاوون اللى خرج الصليبين للابد من الشام اتقتل بعد النصر غيرة وغل و السلطان قطز قتله بيبرس صاحبه بعد ايام من معركة عين جالوت , دا غيرغدر محمد ابو الدهب باستاذه على بيك الكبير و خاير باشا بالسلطان قنصوة الغورى لصالح العثمانيين ...يمكن دا ورثنا فكرة ( دارى على شمعتك تقيد ) فى حين الاجانب يحبوا يفرحوا و يفتخروا بنجاحاتهم 

مش بقول ان الناس دى كانت شياطين او انهم سبب مشاكل المصريين بالكامل 

بس استحالة نفضل نحشى مخنا ان تاريخ مصر المملوكية معركتين و انهم بنوا كام جامع و قلعة و شكرا 

نواجه بلاوينا بقى يمكن نعرف نعالجها و نخلص من الميراث الزفت دا 

بس كدا.

‎

ان تكون ميشيل نى

عام ١٧٦٩ ولد الماريشال ميشيل نى فى مدينة سارلويس على الحدود الفرنسية الالمانية 

دخل الجامعة و لكن محسش انه حابب الحياة المدنية فأنضم للجيش الفرنسى و تدرج فى الرتب و الانتصارات لحد ما اخد رتبة ماريشال الامبراطورية من نابوليون بونابارت لعبقريته العسكرية و حب جنوده ليه و لقبه ( اشجع الشجعان) 

لكن بسبب فشل حملة نابليون على روسيا و اللى كان فيها نى و بعدها القبض على نابليون شخصيا و نفيه لجزيرة البا و عودة الملكية ، ميشيل نى رجع يخدم تحت سلطة الملك لحد ما نابليون هرب من البا و رجع فرنسا ، ساعتها نى رفض يهاجم قائده و انضم ليه ضد الاوامر لحد ما اتهزموا قدام البريطانيين و الالمان فى واترلوو 

و ساعتها اتعملتله محكمة عسكرية و هنا محامى ميشيل نى حاول يطلعه من القضية بأعتبار ان مدينة سارلويس انضمت لالمانيا كغنيمة حرب و بالتالى نى مش مواطن فرنسى ولا يجوز محاكمته 

لكن نى قاطع المحامى قائلا ( انا فرنسى و سأظل فرنسيا ) و حكم عليه بالاعدام رميا بالرصاص عام ١٨١٥

و يوم الحكم وقف قدام فرقة الاعدام الفرنسية و قال : 

( ايها الجنود عندما اعطيكم امرا بأطلاق النار فصوبوا فى وقت واحد نحو قلبى ، و سيكون اخر امر لكم منى ، انا اعترض على ادانتى فلقد حاربت مئات المعارك مع فرنسا و ليس ضدها ....و الان اطلقوا النار ) 

الزتونة : 

مش لاقى كلام فحكتفى باللى اتقال 

و شكرا 

الصورة : اعدام الماريشال ميشيل نى 

الميسترال : ما لها و ما عليها

تحذير : ما يلى رؤية واحد هاوى و مستعد لتصحيح مفاهيمه لو ثبت خطأها 

مصر استلمت حاملة المروحيات جمال عبد الناصر من نوع ميسترال من فرنسا 

و فى واحدة كمان جاية فى سبتمبر القادم 

برة زيطة المؤيد و المعارض 

حنسأل ٣ اسئلة ، الميسترال ايه و ليه و ازاى ؟؟؟ 

ايه هى الميسترال ؟ : 

ببساطة ، هى مركب كبيرة بطول ٢٠٠ متر و وزن ٢٢ الف طن ..دولة يعنى ...السطح بتاعها بيشيل هليكوبترات كأنه مطار و جواها مخازن للطائرات الزيادة و الذخيرة و اوض البحارة و حمولة دبابات و عيادة كبيرة جدا لعلاج المصابين و حاجة على مستوى عالى جدا كعادة الصناعة الفرنسية 

ليه الميسترال ؟ 

الميسترال بيشبهوها بمطواة الجيش السويسرى (swiss knife ) فهى بتعمل حاجات كتير ، منها مطار هليكوبتر حربى عائم ، مستشفى ميدانى محترم جدا ، سفينة شحن و انزال برمائى ، مركز قيادة و تحكم لاسطول من السفن و وحدة انقاذ و اخلاء فى الكوارث و ليها تاريخ كويس فى اجلاء الرعايا الفرنسيين من اماكن الحروب 

و اللى بيتقال ان واحدة حتبقى فى البحر الاحمر عشان امن الملاحة فى باب المندب و التانية فى المتوسط عشان تأمين حقول الغاز الجديدة و منع بلطجة اى دولة على حقنا فيها 

ليه لأ الميسترال ؟ 

اولا ، انها اكبر من انها تبقى سفينة خفيفة ممكن تهرب و تناور من اى هجوم جوى او بحرى و خسارتها حتبقى كارثة لان عليها حمولة كبيرة جدا فلازم قطع قوية تحميها على طول و كدا لازم تشترى او تخصص جزء من بحريتك و طيرانك يلازمها كل ما تخرج من الميناء و دا مكلف جدا جدا 

و انها اصغر من انها تبقى حاملة طائرات زى البلاوى اللى عند امريكا و الواحدة فيهم شايلة ٨٠ مقاتلة ممكن تدافع الى حد ما عن نفسها و تهد دولة كاملة لو حبت لكن الهليكوبتر ايا كانت متقدرش تحمى السفينة قدام مقاتلات دا هى شخصيا عايزة حماية و متعرفش توصل لاهداف بعيدة زى ما بتعمل المقاتلات الامريكية 

ازاى جت الميسترال ؟؟؟ 

المركبين كانوا معمولين لروسيا اساسا و ثمن القطعة ٧٠٠ مليون يورو لكن بعد العقوبات الاوروبية اتلغت الصفقة و المراكب الجديدة وقفت فى الميناء لحد ما تلاقى مشترى و اتقال انها حتتباع للسعودية ثم الكلام اتغير بعد ما مصر دخلت على الخط 

اما عن الدفع ، الكلام المعلن اننا دفعنا جزء و خدنا قرض ميسر من فرنسا بالجزء التانى و ان مفيش طرف اخر دفع فى الصفقة دى اى حاجة ..نقطة 

اخر حاجة 

مفيش بنى ادم عاقل يكره ان جيش بلده يبقى قوى و قادر يوقف الصديق قبل العدو عند حده

لكن برضه الحرب هى الوجه الاخر للسياسة ( فون كلاوسويتز ...قائد المانى) و الجيوش تمشى على بطونها ( نابليون ) 

يعنى من غير سياسة حكيمة واعية و اقتصاد قوى مستقل اى سلاح حيفقد اهميته

فنشوف المواضيع بتوازن و نبص للصورة الاكبر لان عقلية ادارة دولة غير عقلية خناقات الحوارى 

و شكرا

متلازمة الغنى الغبى : ترامب و كراسوس

بيطل علينا كل شوية كائن اشقر سمين عنصرى البعض بيشبهه بالكابوريا المسلوقة بس انا شايفه اقرب لخنزير المزارع جيد التغذية و اللى اقصى مؤهلاته لتولى منصب رئاسة اقوى دولة فى العالم انه معاه ثروة هلامية و صوته عالى حبتين 

و دا عيب الثروة , بتعلى صوت صاحبها بشكل لا يتوازى مع قدراته العقلية و هنا ممكن تجيب رقبته تحت السكينة 

زى واحد صاحبنا , ماركوس كراسوس 

كراسوس كان اغنى راجل فى روما , وناس بتقول انه اغنى من ذكر فى كتب التاريخ , صاحب املاك و اراضى و تجارة تسد عين الشمس 

بس الرجل دا مكتفاش بالفلوس , كان عايز المجد الحربى كمان 

ايام ثورة العبيد بقيادة سبارتاكوس , كراسوس و لانه مش قائد فى الجيش الرومانى , سلح الالالف من من الجنود على حسابه الشخصى و دفع مرتباتهم و عمل جيش هاجم بيه جيش سبارتاكوس المنهك و طحنه و استعد تقبل المجد و الشكر من الشعب كبطل 

لكن فى اخر لحظة قائد رومانى مشهور اسمه ( بومبى ) وصل بقواته و اشترك فى نهاية المعركة و اتنسب ليه كل فضل الانتصار على سبارتاكوس و انقاذ روما , اما كراسوس فخد افا طرقع و علم فى نفس ذات اللحظة 

كراسوس يسكت ..لا طبعا 

قرر انه يهاجم الامبراطورية البارثية اللى كانت بتحكم بلاد فارس و تركيا و العراق رغم انها كانت مرتبطة بمعاهدة سلام مع روما و الحال زى الفل 

رفض كل اعضاء مجلس السناتو و الشعب العمل المجنون دا و الجيش الرومانى رفض يتورط فى حرب ملهاش لزمة 

سنة 54 قبل الميلاد , كراسوس سافر سوريا , المستعمرة الرومانية , و عمل جيش خاص بيه من 42 الف جندى مقابل مرتبات عالية جدا من خزنة كراسوس الشخصية و استدعى ابنه و معاه قوة من الفرسان من بلاد الغال (فرنسا ) و هاجم بيه البارثيين فى قرية اسمها ( كارهى Carrhae ) 

قائد البارثيين الخبير ( سورينا ) اتصدم بحجم القوة اللى بتهاجمه اللى تفوقت عليه 1-4 , لكن قرر انه يستغل عدم خبرة كراسوس بالحرب فى الصحراء و يستنى اما يغلط 

و جت الغلطة اما كراسوس رتب جنوده فى شكل مربع و وقف وسط صحراء العراق متنح رغم توسل قادته انه يرتبهم بطريقة متخليش الفرسان البارثيين يحاصروهم من كل الجهات 

و حصل اللى كان متوقع هجم سورينا بالفرسان و احاطوا بالجيش الرومانى و السهام نزلت زى المطر على العساكر و ما بين كل هجوم و التانى الخيالة البارثية الثقيلة اللى متغطين دروع تخبط صفوف الرومان و توقعهم فالسهام تنزل على جنودهم و هكذا 

و المصيبة الاكبر ان كراسوس امر ابنه يهاجم فرسان البارثيين بكل ما يملك من خيالة الغال 

البارثيين جريوا من قدامهم لحد ما سحبوهم جوة الصحرا و احاطوا بيهم و كل القوة اتدبحت بما فيهم ابن كراسوس اللى بعتوله راسه على حربة 

هنا انهار الجيش الرومانى و طلب السلام من البارثيين اللى غدروا بكراسوس و الوفد اللى رايح يتفاوض على الانسحاب و قتلوه 

و بالعافية هرب لونجينوس الضابط الاول لكراسوس بربع القوة الرومانية لسوريا بعد ما خسر 30 الف جندى و كل الرايات و الاعلام اللى كانت مقدسة عند الجيش الرومانى و خسارتها كانت كارثة و متغسلتش الهزيمة دى حتى بعد ما الامبراطور تراجان احتل بارثيا نفسها سنة 114 ميلادية 

الزتونة : 

فكر على قد دماغك , مش على قد فلوسك 

و شكرا

 الصورة : معركة كارهى و هجوم رماة البارثيين 

دروس من واترلو

بعد ما هرب نابليون من منفاه فى جزيرة البا و مسك حكم فرنسا و اعاد تكوين جيشه من الشعب المبتهج بعودة قائدهم الكاريزمى اللى وداهم فى داهية قبل كدا 

التحالف الاوروبى ضده بقيادة الانجليز و الالمان حبوا ينسفوه فى معركة فاصلة و اختاروا قرية واترلو فى بلجيكا

اثناء المعركة 

غلط نابليون و الماريشال ميشيل نى دراعه اليمين غلطتين قطموا وسط الفرنسيين :

١- نبدأ بالماريشال نى ، اللى امر اغلب الفرسان بتوعه بالهجوم على ما ظهر له كام عسكرى مشاة انجليز بينسحبوا 

( هو للامانة هجم معاهم ، الراجل مكانش من قادة المكاتب اياهم ) 

بس الكارثة انهم كانوا فرقة ضخمة بتعيد ترتيب نفسها ورا جبل 

بسرعة و بانضباط انجليزى فشيخ شكلوا مربعات و كله ركب السونكى ( خنجر طويل بيتركب فى بوز البندقية ) لحد ما المربع بقى شبه القنفد بعمق 3 صفوف من الجنود و المدفعية الانجليزية من بعيد بتساندهم لاخر لحظة

الفرسان وصلوا لقوا الكارثة دى الحصنة اتخوزقت او اترعبت و طلقات البنادق و المدافع من الصفوف الانجليزية مسحت القوة الفرنسية ، المضحك ان نابليون استخدم نفس تكتيك المربعات ضد فرسان المماليك فى معركة امبابة و فشخهم

٢- نابليون كان عامل فرقة من افضل جنوده اسمهم ( الحرس القديم The old guard ) ، دول اللى حاربوا معاه فترات طويلة و معاهم اوسمة و نياشين و مرتبات عالية و عاملهم حرسه الخاص و كل الهشتك اللى فى الدنيا ، بس كان بيخاف عليهم جدا و مبيخليهمش يشاركوا فى المعارك و بيغيظ كل الجيش بيهم 

رغم ان اغلب نجاحاته كانت بجنود شباب عاديين بيحاربوا حتى من غير جذم 

فى اخر المعركة قرر نابليون يهاجم بالحرس على اساس حيقابلوا الانجليز المرهقين و يشحوروهم 

هجمة واحدة ، الحرس تصادم مع الانجليز بعندهم و تدريبهم و كأقل فرقة اتكسر و طلع يجرى 

اول ما الجنود العاديين شافوا الحرس بيهرب طلعت صيحة ( لقد هزم الحرس ...كل رجل ينجو بنفسه ) ، و بعد ما الجيش كان نص متماسك ، انهار بالكامل

الزتونة : 

الصلابة و النظام نص النجاح و الغرور و بركة دعا الوالدين حتنفعك مرة و اتنين التالتة حتتعلق من ودانك

مفيش حد سوبر على الفشل مهما كان ناجح

و شكرا 

الصور : هجوم الفرسان الفرنسيين على مربعات الجيش البريطانى 

هجوم و انكسار حرس نابوليون القديم

عندما تجمع الشركات الضرائب : الثورة الهندية الاولى

نبتدى منين الحدوتة ؟؟؟
 (فى 29 مارس 1857 ابتدت الثورة الهندية الاولى او (العصيان الهندى
بس الحكاية تبتدى من قبلها بكتير

سنة 1600 ملكة بريطانيا اليزابث الاولى , ادت تصريح لمجموعة تجار انهم يعملوا شركة فى الهند حصريا ليهم و محدش من التجار الانجليز ينافسهم مقابل نسبة من الارباح للتاج البريطانى و طبعا الجمارك على السلع اللى حيجيبوها من الهند 
الشركة كانت تحت اسم ( شركة الهند الشرقية ) و ابتدت فى شراء البضائع الهندية الفاخرة اللى كان الاوروبيين بيتهبلوا عليها زى التوابل و القماش و الحرير الفاخر و الشاى و كان فى شركات تانية بتنافسهم و تدى سعر احسن للمزارعين و الصناع الهنود سواء الشركات الفرنسية او الهولندية او التجار الصينيين , و هنا الهنود اختاروا افضل العروض و خدوا فلوس احسن كتير و كان الذهب و الفضة بيتدفق على خزائن ملوك الهند و بيتسحب من اوروبا
لحد هنا و التجارة شطارة

شركة الهند الشرقية لقت ان التجارة الحرة دى مش حتودى ولا تجيب , عملت جيش خصوصى ليها من الضباط السابقين فى الجيش البريطانى و شوية مجندين من الهنود المسلمين و الهندوس (بيسموهم sipoi و عددهم 60 الف جندى )  و ابتدت حرب ضد الفرنسيين و الهولنديين لحد ما طردتهم و غرقت سفنهم و حرمتهم يتاجروا فى الهند و احتكرت بالكامل التجارة الهندية

و المرحلة اللى بعدها , جيش الشركة حارب ملك البنغال (شمال الهند ) و استولى على مساحات اراضى كبيرة و عين ملك اراجوز تبعه و الاراجوز دا اداهم سلطة جمع الضرائب من اراضى شمال الهند الواسعة و ابتدت البهدلة , ياخدوا البضائع دون ما يدفعوا تمنها , يامروا الفلاحين بازالة مزارع الارز و تحويلها للافيون عشان يتصدر الصين ثم امرهم بحرق مزارعهم لما اسعار الافيون رخصت عشان يغلى تانى و كل دا و مطالبين يدوهم ضرائب حتى فى المجاعات اللى جشع الشركة و ظلمها اتسبب فيها
تخيل اما شركة تجارية (نقول نستله او المراعى ) تبقى هى الحاكم على الناس , و الشركة يهمها المكاسب و يتحرقوا كلهم على بعض

فى مارس 1857 , البريطانيين فى احد المعسكرات جابوا خراطيش بارود للبنادق متغطية بشحم من دهن البقر و الخنازير و امروا الجنود الهنود انهم يستخدموا الخراطيش دى دون ادنى اعتبار ان المسلمين استحالة يلمسوا حاجة فيها خنزير و الهندوس بيقدسوا الابقار
بعد الرفض الضابط حكم على الجنود الرافضين ب 10 سنين سجن
باقى الجنود ثاروا و هجموا على البريطانيين و انضم ليهم الاهالى المغلولين من سياسة الشركة و زحفوا كلهم لدلهى عاصمة الهند و من تانية و حرروهم
و كل اللى بناه البريطانيين كان حيتهد لولا اتبعتتلهم تعزيزات عسكرية من بريطانيا
دا غير ان الثوار الهندوس و المسلمين كالعادة مسكوا فى بعض بسبب الخلافات على مين المفروض يبقى الحاكم
و السيخ انضموا للانجليز فى حربهم ضد اخوانهم الهنود خوفا من عوده حكم الشاه المسلم

و نتيجة للخيبة دى , عام 1858 كان التمرد الهندى انتهى بخساير كبيرة للطرفين لكن خد معاه شركة الهند الشرقية اللى الحكومة البريطانية نزعت ملكيتها للاراضى فى الهند و خدتها لصالحها و الشركة اتحلت نهائيا بعدها

وشكرا
الصور : الجنود الهنود يقتلون ضباطهم البريطانيين
معركة استرداد البريطانيين لدلهى

دروس من بانكر هيل

سؤال غريب
احنا نفهم انك تتهزم او تنتصر لكن الاتنين ؟؟؟
حصلت

١٦/٦/ ١٧٧٥ ، حرب الاستقلال الامريكية
المليشيا الامريكية كانت محاصرة مدينة بوسطن و عرفت ان القوات البريطانية حتطلع برة المدينة تحتل المرتفعات حواليها عشان تمنع الامريكان من انهم يحطوا مدافع عليها و يدقوهم على دماغهم
الامريكان اللى كانوا ساعتها شوية مدنيين ببنادق صيد و سيوف قدام البريطانيين اقوى جيش فى العالم
قرروا يحتلوا هضبة اسمها ( بانكر هيل ) و يدافعوا عنها بأى شكل
لكن لانهم حتى فى الجغرافيا زفت احتلوا هضبة جنبها ( برييد هيل ) و حفروا خنادق و استعدوا

تانى يوم البريطانيين هجموا ، صعدوا الهضبة بنظام و عدد كبير متوقعين هروب الامريكان اول ما يشوفوا المعاطف الحمراء المميزة و حراب البنادق البريطانية

محدش هرب و ضربوا عليهم بثبات و تركيز
الموجة الاولى اتطحنت ، التانية كذلك ، التالتة ذخيرة المليشيا خلصت و انسحبوا بعد ما قتلوا 1000 جندى بريطانى بجنرالاتهم ( نص القوة المهاجمة ) و خسروا هم 500 فرد

معركة بانكر هيل ، وضعها ايه فى التاريخ ؟؟
الامريكان بيعتبروها نصر ، اول مرة يتقتل العدد دا من الجنود المحترفين مقابل هضبة واحدة و على يد مدنيين غير مدربين

الزتونة : مش كل تراجع هزيمة و مش كل تقدم نصر
احسبها انت بقى
و شكرا

( الصورة : الهجوم البريطانى على بانكر هيل )

نظرة فى كتاب ( العبودية فى العالم الحديث )

كتاب ( العبودية فى العام الحديث ) 

يلخص فى 3 كلمات : الاستقواء و الاستعباط و التناقض

اكبر مثال للاستعفاء و لوى الدراع الرومان اللى شافوا كل ما هو غير رومانى بربرى همجى مينفعش معاه الا السيف او العبودية ( نفس البرابرة فشخوهم لما ضعفت روما )

اما امثلة الاستعباط و للاسف جت من اتباع الاديان السماوية 

فبالرغم من ان دياناتهم بتدفعهم للمساواة و الرحمة و العدل و ان كل واحد فيهم جرب اما يتطحن تحت اضطهاد الحياة بتبقى ازاى , الا انهم عملوا عبده الاهبل و حولوا نظرهم عن تجارة الرقيق سواء فى العالم الكاثوليكى , البروتستانتى و الاسلامى مقابل الارباح المهولة للى كانوا بيجنوها منها 

و كل واحد اقنع ضميره انه بيعلمهم دين حينقذ ارواحهم بدل ما هم وثنيين او كفار و يعرفهم قواعد المدنية و الحضارة و بالتالى العبودية مكسب ليهم و للعجب دا قريب من تبرير الاحتلال النهاردة زى ( Bringing democracy ) و كدا 

مننكرش ان كان فى محاولات فردية من علماء من كل دين و طائفة ان المهزلة دى تقف بس لحد ما الاقتصاد العالمى مبقاش محتاج العبيد بعد ما اخترعوا المكن و العبيد عددهم زاد لدرجة تبشر بثورات مدمرة و حصلت بطالة رهيبة فى السكان البيض بسبب رخص عمالة العبيد 

فكل الدول كملت فى التجارة الوسخة دى

و اخر حاجة التناقض اللى كان فى سلوكيات بعض الدول زى فرنسا , اللى قالت ان ميصحش ان يبقى فى عبودية على الاراضى الفرنسية فى اوروبا و سمحت باستعباد الاف الافارقة فى مستعمرة هاييتى الفرنسية 

و لما ثاروا و دمروا مزارع البيض و استولوا على البلد , نابوليون بونابرت , بتاع الاخاء و المساواة و اللى كان بيتلسع على افاه فى المدرسة علشان اصله ايطالى و مبيتكلمش فرنساوى عدل , بعت فرقة عسكرية علشان تقبض على قادة الثورة اللى بتطالب الحرية

شوية حقائق : 

1- اختطف من 12 - 15 مليون افريقى و اتنقلوا لامريكا بمعرفة تجار العبيد الاوروبيين اغلبهم من الشباب و الرجال فى سن العمل 

2- تقريبا 20 % من حمولة كل سفينة عبيد كانوا بيموتوا من المرض و الجوع و المعاملة الهمجية و بيترموا فى البحر

الزتونة : لم تنتهى العبودية من العالم حتى اليوم و انت تغيرت صورها فالعمالة دون اجر كافى او حقوق , الاجبار على الدعارة من عصابات الجريمة المنظمة و استغلال اسرى الحرب كلها صور من العبودية 

و اسوء انواعها على الاطلاق عبودية العقل

سواء بالقهر من الحاكم و المجتمع 

او بالتعصب لفكرة معينة و رفض كل ما سواها

معرفش ليه كتبت كل دا

بس الغضب من الى قريته مكانش ينفع يتكتم 

و شكرا

القضية : نمر

علشان نبقى فى الصورة 

فى 47 واحد اعدمتهم السعودية امبارح بتهم الارهاب 

46 محدش سأل فيهم ( منهم مصرى ) 

و واحد الدنيا حرفيا مقلوبة عليه و هو الشيخ نمر باقر النمر 

طب ليه ؟؟؟ 

السعودية دولة ذات اغلبية سنية و أل سعود منذ ظهورهم و هم فى تحالف مع صاحب اكثر الاتجاهات السنية تشددا ( محمد بن عبد الوهاب ) و حاليا احفاده ( أل شيخ ) تقليديا بياخدوا وزارات العدل و التعليم و الشئون الدينية فى المملكة 

و تقريبا كل السلطات فى ايد الملك او عائلته او المتحالفين معاه 

و الوضع مستتقر بشكل كامل

لكن اللى ناقص فى الصورة ان المنطقة الشرقية من المملكة ( القطيف ) ذات اغلبية شيعية 

و دول مهمشين فى حاجات كتير و محرومين من المناصب العليا على حد ادعاءهم 

و دا سهل كتير سيطرة ايران عليهم و اعتبارهم ليها انها الحامية و المدافعة عنهم 

الشيخ نمر احد رجال الدين منطقة القطيف الشيعة , ليه احترام و هيبة لانه اتعلم فى ايران 

لكن كان دائم الانتقاد للسياسة السعودية تجاه الشيعة فى المملكة 

اعتقل 4 مرات و برضه مبطلش دعاية ضد النظام السعودى و الناس فى القطيف مبطلتش مظاهرات و قلق 

و اخر مرة اعتقل صدر عليه حكم بالاعدام على خلفية خطبة ليه شمت فيها فى موت الامير نايف بن عبد العزيز ال سعود وزير الداخلية السعودى عام 2012

و ايران ساعتها هددت انها حتخرب الدنيا لو تم اعدامه 

و تم تنفيذ الحكم امبارح و الراجل اتعدم 

بعدها حصلت مظاهرات و اعمال عنف فى القطيف 

اما فى ايران اتقفلت القنصليات السعودية و احرقت القنصلية فى مدينة مشهد 

و اتضرب صاروخ على سفارة السعودية فى العراق 

و انتهى الامر لطرد السفير الايرانى من السعودية و تعهد ايران بالرد بعنف على اعدام نمر

طب الخلاصة ايه ؟؟؟ 

1- ايران مش حتحارب السعودية و العكس صحيح ....ممكن يحاربوا بعض بالوكالة فى سوريا او اليمن ...لكن حرب مباشرة محدش فيهم قد نتايجها 

2- ايران حتحاول توجه ضربة للمصالح السعودية و فى اقرب فرصة علشان متخسرش احترام و ثقة الشيعة جوة و بره السعودية ...و غالبا حتبقى فى اليمن بانها تمد الحوثيين بالسلاح و التدريب و الخبراء و يستهدفوا الاراضى السعودية او قوات التحالف هناك 

3- السعودية من جانبها معاها تأييد حلفاءها من السنة فى المنطقة العربية و قوة البترول فى حتكسبلها تأييد او حتى استهبال الغرب عن اى حاجة تحصل فى المملكة ..و غالبا حتقمع اى حاجة تحصل فى القطيف بكل العنف الممكن عملا بنظرية ( ابقى خلى ايران تنفعك ) 

4- شيعة المملكة لهم الله ....لا هم ايرانيين ولا هم سعوديين ...و حيتفشخوا بين نظامين ميتخيروش عن بعض عاملينهم كورة تنس كل واحد يلطشها شوية

و شكرا