اكتوبر تانى و تالت و عاشر

بره عن الكلام المكرر :
يوم 6 اكتوبر 1973 كان نقطة فصل فى تاريخ المنطقة العربية
ليه ؟

1- حرب غير متكافئة و بالرغم من كده طلع الطرف الاضعف (تكنولوجيا و ماديا مش عدديا او معنويا ) كسبان ارض ....الجيش الاسرائيلى كان متقدم عننا بقد 5 خطوات فى التكنولوجيا و التسليح و وسائل جمع المعلومات دا غير ان اللى بيدافع موقفه احسن من المهاجم اكيد.....و الغريب انك لما تحاول تتطور نفسك ...الاتحاد السوفيتى كان بيمنعك ...ليه تحارب و تحطه فى وضع محرج قدام امريكا طالما ممكن يبقى الوضع على ما هو عليه ؟؟؟ .....فطبيعى مش حنديك اى سلاح يحفزك تهاجم ....و هاجمنا بالميج 21 اللى متعرفش توصل نص سيناء و الدبابة تى 34 من مخلفات الحرب العالمية التانية ....و رجعنا ارضنا

2- اخر حرب تقليدية .....لانها استخدمت فيها كل الخطط و الاسلحة و التكتيكات الممكنة ....و بين دولتين الخساير توجعهم جدا .....احنا الفلوس و هما البشر ....لكن الحروب بعد اكتوبر ...كان بين دول عظمى و دول متخلفة ..و على سيناريو واحد....الدولة العظمى تتطحن الاضعف بالطيران و الصواريخ دون اى رد لحد ما تنهار ...و طبعا اى خساير للدول العظمى تعتبر ملالييم و اقل من حوادث الطرق عندها ....مثال (حرب الخليج اولى و تانية - افغانستان - ضرب ليبيا و يوغوسلافيا )

3-حرب اكتوبر اثبتت ان الانسان هو اللى بيحرك الالة ...مش الالة هى اللى بتحرك الانسان ....اسرائيل و حتى الان معتمدة على نوعية الحديد اللى عندها .....طائرات بالهبل , دبابات بالهبل و شكرا ....اى حاجة نحلها بالدبابة ...(نهاجم - ندافع- نفض مظاهرة - نجيب الخضار ) .....احنا مكانش حيلتنا نجيب دبابات بالعدد او التجهيز دا ....فاتجهنا اننا نعمل فرد ضد الدبابة ...فرد ضد طائرة .....و نجحت المقامرة و حتى الان ....الفرد ابو RPG بقى فيلم رعب لاى قائد مدرعة و اللى شايل سام 7 يربك حسابات سلاح الطيران كاملا

4- حرب اكتوبر اخر حرب عربية مشتركة ضد اسرائيل ....و ظهر فيها حجم الرعب من اتحاد جيوش العرب ضد الدولة اللى تعدادها قد محافظة فى سوريا او مصر ....و ثبت ان التهديد السورى اخطر بمراحل من المصرى لان من الجولان تشوف وسط اسرائيل فورا ....لكن القيادة السورية كانت اكتر ضعف و تردد و عدم كفائة من القيادة المصرية فمكسبوش حاجة نهائى....
دا غير القوات العراقية اللى طيرانها حارب معانا فى سيناء و دباباتها راحت تنجد دمشق بعد فشل الاسد فى الجولان ....كامل الاحترام للعراق طبعا
الباقى (المغرب - الكويت - الجزائر -ليبيا -السودان ) كانوا وحدات شرفية بالرغم من محاولة كل وحد عمل بطولات وهمية و خصوصا فى الثغرة....

الخلاصة :
ايوة احنا كسبنا اسرائيل ....أيوة احنا رجعنا ارضنا و غيرنا معرفش ....
ايوة فرشنا السكة من القاهرة لحد ممرات سيناء بدم شباب زى الورد

و من حقنا نفخر بيهم و لو يوم فى السنة
ولا كسرة النفس بقت هواية ؟؟؟

و شكرا

الصورة : جندى يحمل مدفع بى 10 مضاد للدبابات وزنه 80 كيلو صاعدا الساتر الترابى

نظرة على كتاب : فرسان الهيكل , القصة الكاملة

التنبيه المعتاد 

بوست (تاريخى - سياسى- طويل ) 

لو مش فاضى , ولا كأنك شفته

بعد الانتهاء من كتاب ( فرسان الهيكل , القصة الكاملة ) 

وصلت لشوية حاجات : 

1- اى جماعة سرية , ليها كذا مرحلة ...الاولى , التكوين ... تسعة رجال مؤمنين حاسيين ان رسالتهم هى حماية الحجاج فى بيت المقدس تحت الحكم الصليبى ...رجال اصحاب مبادئ (بمفهوم عصرهم و مذهبهم ) و اقرب لنظام الاديرة فى القسم بتاعهم (الطاعة و العفة و الفقر الاختيارى ) ...لا يمتلكوا من الدنيا الا الهدوم و سيف و حصان ...و شحن معنوى رهيب 

2- المرحلة التانية ...النمو ...الفرسان المثاليين جنوا اوروبا و مثلوا بالنسبالهم الصورة الرومانسية للفروسية المسيحية ....الفلوس و الهبات نزلت عليهم من الملوك و الامراء و البابا زى المطر ...و فى مرحلة ما امتلكوا تلت فرنسا ....دا غير ممتلكاتهم و قلاعهم فى الشام و القدس ...لانهم الجنود الوحيدين المنظمين و المستعدين للموت فى اى ثانية دون تردد .....لدرجة ان اسرى حطين منهم اضطر صلاح الدين المشهور باخلاقه العالية انه يعدمهم لانهم قالوا ( لو اتحررنا حنحاربك تانى و مش حندفع فدية لارواحنا ) 

3- المرحلة التالتة ...التضخم ....فرسان الهيكل بقى ليهم قانون خاص و الاجتماعات بقت سرية , خدوا قرار من البابا انهم لا يسألوا عن افعالهم الا قدامه و مفيش اى ملك ليه سلطة عليهم ....دولة جوه الدول و قرار مستقل عن باقى الملوك و طبعا خزائن فرسان الهيكل فى اوربا و بتملى و تعبى و تبعت للشرق الامدادات.... و ابتدى التعالى و جر شكل باقى الجماعات زى الاسبتارية و الحرب بين الاخ و اخوه على الارض المقدسة بسبب عباطة عيال 

4- المرحلة الرابعة ....الغرور ....قرارات (مرشدين) الجماعة مكانتش على طول صح ...فى منهم كان بيدور على المجد الشخصى او الغنيمة ...ياخد جنوده و يهجموا لوحدهم و يتدبحوا كلهم ....ينصح ملك القدس بمهاجمة صلاح الدين وسط الصحرا و يتعلقوا من حواجبهم .....معاهدات مع العرب ضد المسيحيين .....حرق و نهب القسطنطينية الارثوذوكسية....و هكذا ....الفرسان مبقوش فرسان ....الجزء الاوربى منهم اتحول لتجار و مزارعين و موظفى بنوك مهمتهم الصرف على المقاتلين فى الشرق ...و النص الشرقى العرب مسحوه بعد انتصارات صلاح الدين و بيبرس و السلطان قلاوون و انسحب لاوروبا بيجر اذيال الخيبة 

5-المرحلة الخامسة ...النهاية ...الملك فيليب التانى (حفيد لويس التاسع اللى حبسناه فى المنصورة) قرر انه لازم يشفط فلوس ال(جماعة) و انه يبقى الملك المقاتل امير لكل الجيوش المسيحية ....استغل قوته انه يعين بطريرك ورق من طراز (توجيهات السيد الرئيس) ....و اتهم الفرسان انهم (شواذ- ملاحدة - بيكسروا الصلبان فى الاجتماعات - شيوعيين - بيعبدوا الكوسة ) و اى تهم ممكن تيجى فى بالك .....و الاحكام كانت معروفة .....مصادرة اموال الجماعة كاملة و حرق المئات منهم بتهم ملفقة تحت التعذيب ....و الشعب الى هتف ليهم من 200 سنة و اتبرع بهدومه ...دلوقتى مبقاش وراه الا تحديفهم بالزبالة و هم فى سكتهم للمحرقة ...الزمن مبقاش زمنهم ...و بالتالى زى الديناصورات انتهوا مع اول هزة قوية 

الزتونة : نهاية فرسان الهيكل مكانش غريبة 

انا شفت جماعة تانية بيحصلها نفس السيناريو من الاول خالص...و سرية برضه ...

تفتكر لو حد فيهم كان قرأ تاريخ , كان حصلهم اللى حصل ؟؟؟

ملاحظة : اجمع المؤرخين الاوروبيين على اخلاق صلاح الدين بالرغم من تشدده الدينى اللى كان سمة العصر ....و اعتقد ان صورة الاخلاق و الفروسية العربية اتحسنت عندى اكتر من صورة الفارس الاوروبى اياها 

اللى قرا كل دا , انا بحبك جدا و متعملهاش تانى D: 

الصورة : اعدام جاك دى مولييه اخر معلمى الجماعة

ستالينجراد على قناة السويس

ليه كل مرة بصدع الناس بالعيد القومى للسويس ؟؟؟ : 

1- بعد حدوث ثغرة الدفرسوار و عبور 500 دبابة اسرائيلية على اقصى تقدير للضفة الغربية للقناة , و انها جريت على الاسماعيلة و السويس علشان يحتلوهم و يحاصروا الجيشين الثانى و الثالث ....الطيران الاسرائيلى مهد للهجوم من يوم 23 اكتوبر بضرب (ثلاجة الخضروات و الفواكة -شبكات الكهرباء - شركة الاسمدة - ميناء الادبية جنوب السويس ) و الدبابات ردمت ترعة السويس الى بتدخل المياة للمدينة

2- السويس المدينة الصغيرة المدمرة من غارات العدو خلال حرب الاستزاف , كانت فى ضهر الجيش التالت الميدانى اللى بيحارب فى سيناء و مفيهاش الا 5000 فرد بعد ما اهلها كلهم اتهجروا بدل ما يتدفنوا تحت بيوتهم , دون اكل او مية او اتصالات او ميناء و متوقع سقوطها مع اول عسكرى اسرائيل يخشها يوم 24 اكتوبر 

3- فى ظل رفض السادات سحب اى قوات من سيناء للدفاع عن السويس , مبقاش فى حل الا ان المخابرات الحربية توزع الكام بندقية و RPG اللى عندها على رجال المقاومة الشعبية المدنيين , و بمبادرة شخصية من قائد الفرقة 19 مشاة استغنى عن جزء من رجالته المسلحين بمضادات الدبابات و رجعهم السويس دون امر من القيادة 

4- فجر يوم 24 , المحافظ بدوى الخولى فى جامع الشهداء قال للناس ان الاقتحام الاسرائيلى فى خلال ساعات و طالبهم بالصمود , و فى نفس الوقت ضرب الطيران المدينة بعنف رهيب و ساب 3 شوارع سليمة للدبابات تخش منها .....اتوزع الناس على 4 كمائن للدفاع عن المدينة ....الدبابات دخلت و كان اللى فيها فاتحين الابراج و بيتمشوا بره على اعتبار المعركة انتهت ....

5- انتظر اهالى السويس و الجنود دخول اخر دبابات للشوارع الضيقة للمدينة حول قسم الاربعين ....و تم نسف اول و اخر دبابة فى الطابور ....و ابتدت معركة من بيت لبيت فى شوارع العدو ميعرفش عنها اى حاجة , و حصل مجزرة لاى فرد مكناش جوة دبابة او مدرعة .....اللى عرف ينسحب رجع ...اللى معرفش ساب المدرعات و جرى على البيوت المهدمة يتحصن فيها و يستنى النجدة 

6- رجال المقاومة استخدموا كل الاسلحة من اول الصواريخ لحد جراكن البنزين اللى كبوها على الدبابات علشان العدو ميسحبهاش و يصلحها او ينكر الخسائر ...و استشهد منهم كتير لدرجة ان الدفن كان سريع و فى مكان سقوط الشهداء مش فى المقابر ...و حتى بعد ما اتدفنوا معظم القبور كان عليها كلمة (مجهول ) لصعوبة التعرف عليهم 

7- لما جه الليل مع ضرب المدفعية للمدينة , خرج الجنود الاسرائليين من البيوت على رجليهم و هربوا خارج المدينة دون جثث زملائهم او المصابين و انتهت المعركة يوم 25 اكتوبر

و استمر الحصار 100 يوم كمان ...على امل ان المدينة تسلم من قلة الاكل و المية ...لكن مسلمتش ( دى قصة لوحدها ) ...ولا الجيش الثالث اتحاصر ( و دى قصة كمان) ...و كل العملية انتهت بانسحاب اسرائيل من الضفة الغربية للقناة و رجوعها لمواقعها و بعدها الانسحاب النهائى من سيناء بعد اتفاقية السلام 

(لو كانوا كسبانين مكانوش انسحبوا من متر واحد , و لكم فى الجولان و مزارع شبعا مثال ) 

من حقى افخر بأن الواحد معاه نفس الجنسية اللى مع الناس دى 

و ان فى ناس امنت ان الارض دى تستحق انهم يواجهوا اطنان حديد بجراكن بنزين 

و سلاح روسى ما يعلم بيه الا ربنا 

صباح الفل على ستالينجراد العرب السويس الباسلة 

سيناء و الاسمو ايه على مر العصور

1- مقدرش اتكلم عن سيناء من اول الملك مينا , لان الكلام حيطول و مش حنخلص بس الزتونة انها كانت بوابة الامبراطورية المصرية لاحتلال الشام لحد حدود تركيا ايام الفراعنة و الايوبيين و المماليك و محمد على......و كانت المدخل للهكسوس و الفرس و الاغريق و الرومان و العرب و الاتراك لاحتلال مصر فى عصور الوكسة ....لا هى الحصن المنيع , ولا هى كوم رمل تحت بيتكم

2- سيناء من اول عصر عبد الناصر كان الاستراتيجية العامة ليها ( خليها فاضية علشان لو اسرائيل هاجمت نعرف نصدها فى الهواء الطلق) ...يعنى كانت حوش المدرسة او سطوح البيت او اى مساحة فاضية بتحط فيها الكراكيب و الدجاج و كده 

....

3- المشكلة ان المعركتين اللى دخلت فيهم اسرائيل هجوميا (العدوان الثلاثى و النكسة ) ...انطلقت بسرعة مرعبة جوة اراضى سيناء لدرجة انها طوقت الجيش المصرى ...مهو لا فى سكان تتكعبل فيهم زى الاسماعيلية و لا مدن تسحب دباباتهم جواها و تفرمهم زى ما حصل فى السويس ...فراغ ...تخيل عربية سيادتك بتجرى على الطريق السريع ...يعنى نظرية (سيبها فراغ علشان الطراوة ) ثبت انه غباء صافى كامل الدسم

4- بعد حرب اكتوبر و كامب ديفيد و (صباح الخير يا سينا ) ...الانظمة الحاكمة حبت تستغل سيناء ...لكن الاستغلال كعادة عصر مبارك كان فى اللى بيجيب دولارات و بسرعة ...السياحة ....ظربيح قرى سياحية على ساحل جنوب سيناء ....فعلا نجح انه يسحب العربان من حياتهم البدوية و يدخلهم فى منظومة السياحة (سواء شرعى او مجرد اتاوات على القرى و الفنادق كرسوم حراسة ) ...لكن معملهمش ولا نشاط مستقر منتج يسترزقوا منه و يربطهم بالارض بدل الترحال ....

5- وسط و شمال سيناء نظرا لانعدام مقومات السياحة (المشخلعة ) فيها ....هو منجم فحم المغارة و مصانع الاسمنت و شكرا .....اما عربان الشمال فالحال هو الكام شجرة و المعزتين للمحترم فيهم ...و المخدرات و السلاح و تهريب البشر للى قرروا الانحراف منهم....و بالتالى مش حنندهش اما كله بقى يجرى ورا التهريب و الانفاق و ايواء الارهابيين مقابل الدولارات من جوة و بره...مهو الحال منيل و محدش معبرهم لدرجة ان معهمش بطايق ولا شهادات ميلاد من الاساس

6- نظام مبارك لعب لعبة صغيرة اسمها (ترعة السلام ) ....قناة مية عذبة تحت قناة السويس تنقل المية لسيناء و الحياة تبقى بمبى .....المشروع كالعادة طلع كرتونى و للاستهلاك الاعلامى فقط و شباب الوادى اللى راحوا سيناء لقوا نفسهم رهينة عند القبائل للى نحلت وبرهم اتاوات و دفعهوهم تمن الارض مرتين على الاقل ...حتى الان مشفناش من انتاج الاراضى دى اى حاجة و السكان رهاين عند اى عيل برشاش هناك ...لو ملكش ضهر هناك ( و بتدفعله ) حتتعلق

7- السيسى حيتقدمله 3 حلول من جمعية المنتفعين اللى حواليه , عسكريين و مدنيين ...و من معرفتى بوساخة امخاخ بعض منهم ...دى عينة من الحلول المقترحة :

اولا : الحل الامنى من طراز (هات مراته و هو حيعترف ) حيوديك فى داهية زى ما ودى اللى قبلك و باعوه بالرخيص يوم 28 يناير ..العربان ممكن يحاربوك للصبح فى الصحرا و يخفوا عنك المعلومات و يمدوا عدوك بيها .....الا الكرامة حتى لو مجرمين

ثانيا : الحل الحونين من طراز (سنحاربهم بالحب و فرق الفنون الشعبية ) ...حبك برص ...لو مشافوش منك بأس و قوة حيقولوا عليك اهبل او خواجة او زبون ....و يشتغلوك للصبح زى ما بعض منهم بيشتغلوا اصحاب الفنادق و يقلبوهم

ثالثا : حل رجال الاعمال ( اديهم فلوس و شغلهم فى مصنع بسكوت ) .....فى غيرك بيدفع بالدولار و بالشوال يا مؤمن ....الازمة مش فلوس او وظايف بس ...الازمة مين الكبير فى المكان ...مين شيخ القبيلة المسيطر اللى الكل بيهابه ...اللى بيبعزق الهدايا على اتباعه بكرم و ممكن يطبق ايده على حد يخليه كوم تراب او خالفه

اخيرا 

ربنا يستر لان المعركة مش اخرها قفل الانفاق او شريط عازل او خندق مائى 

السلاح متخزن كتير و الف من تديله 20 جنيه و يقتلك ابوه 

الحل فى بدو سيناء و مش فى اى جهة بره او جوه

شكر خاص لاى حد قرا الهباب دا