دروس من بانكر هيل

سؤال غريب
احنا نفهم انك تتهزم او تنتصر لكن الاتنين ؟؟؟
حصلت

١٦/٦/ ١٧٧٥ ، حرب الاستقلال الامريكية
المليشيا الامريكية كانت محاصرة مدينة بوسطن و عرفت ان القوات البريطانية حتطلع برة المدينة تحتل المرتفعات حواليها عشان تمنع الامريكان من انهم يحطوا مدافع عليها و يدقوهم على دماغهم
الامريكان اللى كانوا ساعتها شوية مدنيين ببنادق صيد و سيوف قدام البريطانيين اقوى جيش فى العالم
قرروا يحتلوا هضبة اسمها ( بانكر هيل ) و يدافعوا عنها بأى شكل
لكن لانهم حتى فى الجغرافيا زفت احتلوا هضبة جنبها ( برييد هيل ) و حفروا خنادق و استعدوا

تانى يوم البريطانيين هجموا ، صعدوا الهضبة بنظام و عدد كبير متوقعين هروب الامريكان اول ما يشوفوا المعاطف الحمراء المميزة و حراب البنادق البريطانية

محدش هرب و ضربوا عليهم بثبات و تركيز
الموجة الاولى اتطحنت ، التانية كذلك ، التالتة ذخيرة المليشيا خلصت و انسحبوا بعد ما قتلوا 1000 جندى بريطانى بجنرالاتهم ( نص القوة المهاجمة ) و خسروا هم 500 فرد

معركة بانكر هيل ، وضعها ايه فى التاريخ ؟؟
الامريكان بيعتبروها نصر ، اول مرة يتقتل العدد دا من الجنود المحترفين مقابل هضبة واحدة و على يد مدنيين غير مدربين

الزتونة : مش كل تراجع هزيمة و مش كل تقدم نصر
احسبها انت بقى
و شكرا

( الصورة : الهجوم البريطانى على بانكر هيل )

نظرة فى كتاب ( العبودية فى العالم الحديث )

كتاب ( العبودية فى العام الحديث ) 

يلخص فى 3 كلمات : الاستقواء و الاستعباط و التناقض

اكبر مثال للاستعفاء و لوى الدراع الرومان اللى شافوا كل ما هو غير رومانى بربرى همجى مينفعش معاه الا السيف او العبودية ( نفس البرابرة فشخوهم لما ضعفت روما )

اما امثلة الاستعباط و للاسف جت من اتباع الاديان السماوية 

فبالرغم من ان دياناتهم بتدفعهم للمساواة و الرحمة و العدل و ان كل واحد فيهم جرب اما يتطحن تحت اضطهاد الحياة بتبقى ازاى , الا انهم عملوا عبده الاهبل و حولوا نظرهم عن تجارة الرقيق سواء فى العالم الكاثوليكى , البروتستانتى و الاسلامى مقابل الارباح المهولة للى كانوا بيجنوها منها 

و كل واحد اقنع ضميره انه بيعلمهم دين حينقذ ارواحهم بدل ما هم وثنيين او كفار و يعرفهم قواعد المدنية و الحضارة و بالتالى العبودية مكسب ليهم و للعجب دا قريب من تبرير الاحتلال النهاردة زى ( Bringing democracy ) و كدا 

مننكرش ان كان فى محاولات فردية من علماء من كل دين و طائفة ان المهزلة دى تقف بس لحد ما الاقتصاد العالمى مبقاش محتاج العبيد بعد ما اخترعوا المكن و العبيد عددهم زاد لدرجة تبشر بثورات مدمرة و حصلت بطالة رهيبة فى السكان البيض بسبب رخص عمالة العبيد 

فكل الدول كملت فى التجارة الوسخة دى

و اخر حاجة التناقض اللى كان فى سلوكيات بعض الدول زى فرنسا , اللى قالت ان ميصحش ان يبقى فى عبودية على الاراضى الفرنسية فى اوروبا و سمحت باستعباد الاف الافارقة فى مستعمرة هاييتى الفرنسية 

و لما ثاروا و دمروا مزارع البيض و استولوا على البلد , نابوليون بونابرت , بتاع الاخاء و المساواة و اللى كان بيتلسع على افاه فى المدرسة علشان اصله ايطالى و مبيتكلمش فرنساوى عدل , بعت فرقة عسكرية علشان تقبض على قادة الثورة اللى بتطالب الحرية

شوية حقائق : 

1- اختطف من 12 - 15 مليون افريقى و اتنقلوا لامريكا بمعرفة تجار العبيد الاوروبيين اغلبهم من الشباب و الرجال فى سن العمل 

2- تقريبا 20 % من حمولة كل سفينة عبيد كانوا بيموتوا من المرض و الجوع و المعاملة الهمجية و بيترموا فى البحر

الزتونة : لم تنتهى العبودية من العالم حتى اليوم و انت تغيرت صورها فالعمالة دون اجر كافى او حقوق , الاجبار على الدعارة من عصابات الجريمة المنظمة و استغلال اسرى الحرب كلها صور من العبودية 

و اسوء انواعها على الاطلاق عبودية العقل

سواء بالقهر من الحاكم و المجتمع 

او بالتعصب لفكرة معينة و رفض كل ما سواها

معرفش ليه كتبت كل دا

بس الغضب من الى قريته مكانش ينفع يتكتم 

و شكرا

القضية : نمر

علشان نبقى فى الصورة 

فى 47 واحد اعدمتهم السعودية امبارح بتهم الارهاب 

46 محدش سأل فيهم ( منهم مصرى ) 

و واحد الدنيا حرفيا مقلوبة عليه و هو الشيخ نمر باقر النمر 

طب ليه ؟؟؟ 

السعودية دولة ذات اغلبية سنية و أل سعود منذ ظهورهم و هم فى تحالف مع صاحب اكثر الاتجاهات السنية تشددا ( محمد بن عبد الوهاب ) و حاليا احفاده ( أل شيخ ) تقليديا بياخدوا وزارات العدل و التعليم و الشئون الدينية فى المملكة 

و تقريبا كل السلطات فى ايد الملك او عائلته او المتحالفين معاه 

و الوضع مستتقر بشكل كامل

لكن اللى ناقص فى الصورة ان المنطقة الشرقية من المملكة ( القطيف ) ذات اغلبية شيعية 

و دول مهمشين فى حاجات كتير و محرومين من المناصب العليا على حد ادعاءهم 

و دا سهل كتير سيطرة ايران عليهم و اعتبارهم ليها انها الحامية و المدافعة عنهم 

الشيخ نمر احد رجال الدين منطقة القطيف الشيعة , ليه احترام و هيبة لانه اتعلم فى ايران 

لكن كان دائم الانتقاد للسياسة السعودية تجاه الشيعة فى المملكة 

اعتقل 4 مرات و برضه مبطلش دعاية ضد النظام السعودى و الناس فى القطيف مبطلتش مظاهرات و قلق 

و اخر مرة اعتقل صدر عليه حكم بالاعدام على خلفية خطبة ليه شمت فيها فى موت الامير نايف بن عبد العزيز ال سعود وزير الداخلية السعودى عام 2012

و ايران ساعتها هددت انها حتخرب الدنيا لو تم اعدامه 

و تم تنفيذ الحكم امبارح و الراجل اتعدم 

بعدها حصلت مظاهرات و اعمال عنف فى القطيف 

اما فى ايران اتقفلت القنصليات السعودية و احرقت القنصلية فى مدينة مشهد 

و اتضرب صاروخ على سفارة السعودية فى العراق 

و انتهى الامر لطرد السفير الايرانى من السعودية و تعهد ايران بالرد بعنف على اعدام نمر

طب الخلاصة ايه ؟؟؟ 

1- ايران مش حتحارب السعودية و العكس صحيح ....ممكن يحاربوا بعض بالوكالة فى سوريا او اليمن ...لكن حرب مباشرة محدش فيهم قد نتايجها 

2- ايران حتحاول توجه ضربة للمصالح السعودية و فى اقرب فرصة علشان متخسرش احترام و ثقة الشيعة جوة و بره السعودية ...و غالبا حتبقى فى اليمن بانها تمد الحوثيين بالسلاح و التدريب و الخبراء و يستهدفوا الاراضى السعودية او قوات التحالف هناك 

3- السعودية من جانبها معاها تأييد حلفاءها من السنة فى المنطقة العربية و قوة البترول فى حتكسبلها تأييد او حتى استهبال الغرب عن اى حاجة تحصل فى المملكة ..و غالبا حتقمع اى حاجة تحصل فى القطيف بكل العنف الممكن عملا بنظرية ( ابقى خلى ايران تنفعك ) 

4- شيعة المملكة لهم الله ....لا هم ايرانيين ولا هم سعوديين ...و حيتفشخوا بين نظامين ميتخيروش عن بعض عاملينهم كورة تنس كل واحد يلطشها شوية

و شكرا

المارسيلييز من فالمى لاستاد باريس

لفتنى جدا مشهد المشجعين الفرنسيين و هم خارجين من استاد باريس بعد الهجمات الارهابية الاخيرة 

ازاى فجأة حد منهم ابتدى يغنى النشيد الوطنى الفرنسى و كل الناس قالت واره فى مشهد جميل و مهيب 

فقررت اكتب و ادور زيادة عن تاريخ واحد من اقدم الاناشيد الوطنية فى العالم و 

بعد الثورة الفرنسية 

و اعلان الجمهورية الاولى 

الدول الملكية فى اوروبا حاربت فرنسا عشان تمنع انتشار الثورة ليها 

و كان اقرب الاعداء النمسا و بروسيا اللى قرروا الهجوم فورا

فى حين الجيش الفرنسى كان شبه منهار لان اغلب الضباط كانوا منحازين للملك و هربوا بعد الثورة

و المتطوعين للتجنيد كانوا من الثوريين الفقراء و الشباب عديم الخبرة

سنة 1792 عمدة ستراسبورج طلب من الشاعر ( روجيه دى ليزل ) انه يألف نشيد يجمع المواطنين من كل فرنسا للدفاع عن بلدهم , فألف قصيدة بعنوان ( اغنية من اجل جيش الراين ) 

و بعد ما اتلحنت 

مجموعة المتطوعين من مارسيليا فى اقصى الجنوب الفرنسى كانوا اول ناس غنوه فى مسيرتهم لحد باريس للانضمام للجيش 

و هنا اتغير اسمه لل( La Marseillaise ) و اعتمدوه كنشيد وطنى من سنة 1795 و حتى الان 

و دا اللى بنسمعه اليومين دول بيتعزف فى اى حاجة تخص فرنسا كنوع من التكريم

اخر الحدوتة , شوية من المتطوعين البؤساء دول غلبوا النمساويين و البروسيين دفعة واحدة فى معركة فالمى ( Battle of Valmy ) بعد ايام من كتابة القصيدة 

و بعدها بكام سنة استسلمت النمسا للجيش الفرنسى بقيادة نابوليون بونابرت

ملاحظة : انا بسمعه لما ببقى فاصل رغم انى مش فاهم الكلام 

( اعتبروه جهل مصاحب بكراهية لل verb irrigulers )

و شكرا

( الفيديو : المشهد من الاستاد ) 

https://www.youtube.com/watch?v=4iQ2cHuZ0xE

عن نابليون و داعش

قصة قصيرة : 

نابليون بونابارت بعد فشله فى منع روسيا من التجارة مع انجلترا

قرر انها لازم تخرج برة اللعبة خالص زيها زى النمسا و بروسيا ( المقاطعة الالمانية الاقوى قبل التوحيد )

فجمع جيش ضخم من خيرة القوات الفرنسية الخبيرة و عمل ( la grand armee ) او الجيش الكبير 

و اتحرك للاراضى الروسية سنة ١٨١٦

القيصر الكسندر الاول لقى ان اسلم طريقة انه ميواجهش نابوليون فى معركة مفتوحة لان عساكره اقل خبرة و تسليح رغم عددهم 

دا غير ان القادة بتوعه يعتبروا هواة بالنسبة لنابليون 

و دا ظهر فى معركتين كبار اتهزم فيهم الروس فى سمولنسك و بورودينو

لكن ممكن يسحبه جوة الاراضى الروسية الواسعة و يحرق المزارع و البيوت و اى حاجة ممكن يستغلها الجيش الفرنسى الضخم للى استحالة يجيب من بلدهم اكل يكفيه طول الحملة 

و يطلق الفرسان الخفيفة من سكان الحدود ( القوزاق Cossacks ) يصطادوا العساكر اللى تشرد و يحرقوا عربيات الامدادات و يخلوا الجيش الفرنسى فى حالة انزعاج مستمر

الكسندر مكانش عنده عزيز ، حتى لما وصل نابليون لعاصمته موسكو امر انهم يحرقوها بالكامل و الجيش الفرنسى مستفتدش اى حاجة و اترمى فى البرد الروسى المرعب دون اكل او هدوم او خشب للنار حتى

الجيش الفرنسى دخل روسيا 680 الف جندى ، رجع باريس ب 25 الف ...اغلبهم مات من البرد و الجوع و الدوسنتاريا و كل دا فى ست شهور فقط 

و كانت بداية النهاية لنابليون و السيطرة الفرنسية على اوروبا

الزتونة : 

جيش نابليون دون تموين اتمسح فى ست شهور بمجهود دولة واحدة 

رغم ان هو شخصيا صاحب مقولة ( الجيوش تمشى على بطونها ) فى اشارة عن اهمية التموين و الامداد 

داعش و اخواتها ، مكملين ليه ؟؟؟

كتاب (المطرقة و الدرع ) : تلخيص ما يجيب تلخيصه

بدل ما الخص كتاب ( المطرقة و الدرع : قصة المخابرات المركزية الامريكية ) بحاله 

حكتب قصة واحدة منه و هى حتقوم بالواجب :

بعد وصول فيدل كاسترو للسلطة فى كوبا و الاطاحة بالديكتاتور باتيستا 

امريكا عادى جدا اتخلت عن حليفها لما لقت انه خلاص...بح ...مبقاش محبوب من اغلبية الشعب 

و قالت اما نشوف كاسترو دا نظامه ايه 

و مع الوقت ظهر ان كاسترو شيوعى متعصب و استحالة تقبل امريكا بدولة شيوعية على مرمى البصر من اراضيها .

فقررت تخلص من كاسترو و نظامه

استغلت ان عدد كبير من الكوبيين هربوا من بلدهم لامريكا بعد الثورة و مش طايقين كاسترو

ابتدت الCIA تنظمهم فى جيش صغير و تدربهم على السلاح و حرب العصابات بهدف انزالهم فى كوبا علشان يبتدوا ثورة ضد كاسترو 

دا بعدت شوية كمان و ابتدت تكون حكومة كوبية فى امريكا على اساس تعتبرها الحكومة الشرعية و ممكن على حسها تودى قوات امريكية لكوبا بحجة دعمها

و العجيب ان الازمة اللى قابلت المخابرات هى ازاى يدربوا مليشيا على الاراضى الامريكية للاطاحة بنظام فى دولة تانية 

و دا عكس التزامات امريكا بالحرية و حق الشعوب فى تقرير المصير و القرع دة 

فنقلت الجيش يتدرب على حساب امريكا فى جواتيمالا استعدادا للهجوم

و دعمته بطائرات امريكية من نفس النوع اللى عند الجيش الكوبى و بطيارين كوبيين علشان يتقال انهم من المنشقين عن الجيش الكوبى و ان امريكا برة الموضوع

و لما جت ساعة الانزال فى 17 ابريل 1961 ، الخبر بشكل او اخر اتسرب و وصل لكاسترو 

اللى استنى قوة الغزو بالدبابات على شاطئ مكان اسمه ( خليج الخنازير ) و دور فيهم الفرم و صد الهجوم بالكامل لمدة 3 ايام

و امريكا فى اخر لحظة سحبت طيرانها اللى المفروض يدعم الناس اللى هى ورطتهم فى حرب ضد وطنهم و سابتهم يتسلخوا و حتى لما قامت بكام غارة 

كان الاوان فات

راح فى العملية دى 4 طيارين امريكان و 114 معارض كوبى دا غير السلاح و الذخيرة 

و كانت فضيحة على كل المستويات و طلع منها كاسترو اقوى مما دخل

موقعة خليج الخنازير تلخيص لسياسة المخابرات الامريكية من الستينات حتى الان 

احنا منعملش حاجة بأدينا 

احنا ندرب ناس من جوة البلد اللى مضايقنا و نمدهم بالاموال و السلاح و هم يخلصوا على بعض

و لو فشلوا نقول منعرفهمش يابيه

يا رب حد يكون فهم حاجة 

و شكرا

دبة الاعلام و صاحبها : رؤية فى كتاب قصف العقول

و انا بخلص فى كتاب ( قصف العقول ) عن استخدام الدعاية فى الحروب 

وقفت قدام اربع نقط لخصهم الكاتب عن ازاى الدعاية الغشيمة ضد الالمان فى الحرب العالمية الاولى شاركت فى اشعال الحرب العالمية التانية و هم كالتالى :

1- اثناء الحرب الانجليز لقوا ان اعداد المتتطوعين فى الجيش بتقل مع زيادة المعارك الفاشلة فأضطروا لاستخدام كل وسائل الاقناع و الحرب النفسية من السينما , للجرائد , للمسيرات للمنشورات اللى بتترمى على الالمان , فى حين فشل الالمان فشل تام فى الموضوع دا و ركزوا على بناء جنود مدربين و بس و دا اللى خلى المواطنين الالمان فى نهاية الحرب يثوروا على القيصر و يطلبوا السلام بعد ما طهقوا من الحصار البحرى و الخساير عكس الحلفاء اللى كانوا على طول بيبنوا قد ايه هم سعداء و الحرب مش مأثرة فيهم رغم السواد اللى كانوا فيه . هتلر استفاد من الدرس و عين جوبلز عبقرى الاعلام و الدعاية علشان يعمل امة من المقاتلين اللى مبنيين على عقيدة معرفتش اى دعاية للحلفاء تهزها لحد اخر معركة على ابواب برلين و دا زود الخساير اضعاف الاضعاف

2- الرئيس الامريكى ويلسون علشان يبعد الامبراطورية النمساوية المجرية حليفة المانيا من الحرب و لانه عارف انها مكونة من شعوب و اعراق كتير و محدش فيهم طايق التانى , دا حتى اسمها اتحاد بين دولتين ميقربوش لبعض واحدة غنية متقدمة ( النمسا ) و التانية فقيرة مسحولة ( المجر ) فقال فى خطاب ان كل الشعوب ليها حق تقرير المصير بعد الحرب و دى كانت دعوة لكل شعوب الامبراطورية للانضمام للحلفاء مقابل حتة من التورتة و بعدها الجنود استسلموا باللالاف و اتفكت الامبراطورية النمساوية المجرية ل ( رومانيا – تشيكوسلوفاكيا – يغوسلافيا – المجر – النمسا – بولندا ) و المانيا بقت لوحدها . لكن ايطاليا اللى دخلت الحرب مع الحلفاء كان ليها اطماع فى التقسيمة دى و لما لقت ان محدش اداها اى حاجة بقى عند الايطاليين قدر مرارة و شعور بالخيانة و دا اللى نجح واحد اهطل زى موسولينى علشان لعب على النقطة دى ( كرامة الامة الايطالية الجريحة ) و سحبهم وراه لحرب تانية

3- نظرا لأن انجلترا وحيدة متقدرش على المانيا و على رأى القيصر الالمانى ( الجيش البريطانى مكون من 160 الف مقاتل و هؤلاء يمكن للشرطة الالمانية القبض عليهم ) فحاولوا انهم يزقوا الامريكان للحرب بكل ما امكنهم من مهارة فى الدعاية و الاعلام و مع الزن المستمر الراى العام الامريكى بقى متعاطف معاهم جدا لكن مدخلوش الحرب لحد ما المخابرات البريطانية سربت للامريكان رسالة من وزير الخارجية الالمانى ( زيمرمان ) للسفير فى واشنطن بانه يشجع المكسيك على الحرب ضد امريكا مقابل تكساس و اريزونا بعد الحرب . بعد البرقية دى الامريكان دخلوا المعركة و لكن لما الحرب خلصت عرفوا ان الانجليز تلاعبوا بيهم و ان البرقية مسروقة من شبكة الاتصالات الامريكية , يعنى الانجليز كانوا بيتجسسوا على الامريكان شخصيا , و دا اللى خلى الامريكان ميخشوش الحرب العالمية التانية الا مـتأخر جدا و اوربا تضيع بشكل شبه كامل لمجرد عدم الثقة فى اى حاجة الانجليز بيقولوها

4- فكرة الدعاية ال ( Over ) بمعنى تشويه الالمان فى عيون الشعب الانجليزى لدرجة الشيطنة و افتعال جرائم و بلاوى معملوهاش اساسا علشان يشحنوا الناس ضد الالمان بشكل عام مش ضد حكوماتهم و دا عمل كارثتين بعد الحرب , الاولى ان الناس ضغطت على الحكومات المنتصرة لفرض شروط استسلام مهينة على الالمان و خدوا من اراضيهم مساحات كبيرة و دفعوهم غرامات خرافية و محدش فكر فيهم كبشر و دا سهل على هتلر استغلال غضب الالمان فى الوصول للسلطة المطلقة و التانية ان نفس الناس بعدا ما هديوا و ابتدت التحقيقات اتضح ان الاعلام كذب عليهم فمحدش صدق لما اتقال بعدها بكام سنة ان هتلر بيعمل ابادات جماعية و تجارب على البشر رغم ان دا كان صحيح

الزتونة : قالوها زمان ( الزن على الودان امر من السحر ) 

و فى بلدنا مفيش اكتر من الزنانيين و الودان

فربنا يستر 

و شكرا