دأب شعبنا على انه يعتبر كلمة ( لوبى )
كأنها كلمة عيب لأنها كان بيتلزق وراها كلمة ( الصهيونى )
فتبقى اللوبى الصهيونى
لكن ايه المعنى الكبير للكلمة دى
واحد واحدة كدا :
1- كلمة لوبى فى السياسة معانها جماعة ما تمارس تأثير على صانع القرار....شلة ناس نفوذها قوى ما يكفى انهم يوصول للرئيس او معاونيه و يدفعوه للقرار اللى هم عايزينه و يخدمهم
2- اللوبى معناه بالانجليزى ( صالة الانتظار فى الفنادق او القصور ) و دى اللى كان بيتجمع فيها السياسيين علشان يتبادلوا الاراء و يشوفوا حيقولوا ايه قبل ما يطلعوا المؤتمرات او جلسات مجلس الشعب ...و طابعا كل المؤامرات كانت بتاخد اللمسة الاخيرة فى اللوبى
3- الرواد و اكثر من استفاد من اللوبى هم الحركة الصهيونية .....استغلوا رجال الاعمال اليهود المنتشرين فى كل دول العالم فى الضغط على السياسيين مقابل تمويل حملاتهم الانتخابية و بالمقابل ان السياسيين يايدوا اى حاجة ليها علاقة بالحركة الصهيونية و يمنعوا اى قرار ادانة ليها ...و نجحوا نجاح كبير جدا ...اكبره استصدار وعد بلفور من الحكومة البريطانية لاقامة وطن لليهود فى فلسطين و المليونيرات اليهود زى عيلة روتشيلد كان ليهم دور كبير تمويل المهاجرين و ضمان عدم تدخل الحكومة فى عملية الهجرة لحد ما بقت فوضى و حتى الجيش البريطانى معرفش يلمها ..و حتى اليوم اللوبى الصهيونى من رجال الاعمال و السياسيين بيقوم بدوره فى ضمان وصول الدعم الامريكى لأسرائيل و حل اى مشاكل تحصل بين البلدين
4- ظهرت فكرة اللوبى ما قبل الحربين العالميتين بشكل ودى اكتر ....الجالية الايطالية الكبيرة فى امريكا كانت بتوجه الساسة الامريكيين لعدم دخول الحرب بشكل علنى ...الايطاليين اللى تغلغلوا فى الحياة الامريكية و بقوا كل حاجة من اول الفنانين لحد البلطجية كانوا بيتحكموا فى كتلة تصويتية كبيرة من الناحبين ....و طبعا الايطاليين كانوا بيحبوا يسكنوا فى احياء خاصة بيهم ...فكان السيناتور اللى يضمن تأييدهم بيكسب الدايرة ..و دا اللى خلى الحكومة الايطالية فى وطنهم الام تتطلب منهم التأثير على انضمام الامريكان للحرب ...و حصل و دخل الامريكان الحرب مرتين متأخر و عانت ايطاليا من حلفاءهم الالمان اكتر ما عانت من اعداءهم الامريكان ..الامريكان كانوا فاكريين على طول ان دول قرايب جيرانهم الايطاليين اللى دمهم خفيف و ان كلهم مظلومين و موسولينى بس هو يستحق العقاب عكس ما حصل فى المانيا اللى اتعجنت و مترحمتش حتى بعد الاستسلام ...و هنا اللوبى الايطالى لحق دولة كاملة من الدمار
5- العجيب اليومين دول ان اللوبى او (جماعة المصالح المشتركة ) بقت موجودة فى كل حاجة , فى الاقتصاد فى السياسة فى الكورة
مثلا جمعية رجال الاعمال اللى أسسها جمال مبارك كتجمع رجال الاعمال الشباب المنتمين للحزب الوطنى بقت جماعى ضغط على الحكومة لتبنى سياسات اكتر تساهل مع رجال الاعمال الشباب عن الكبار و همزة وصل ما بين رجال الاعمال المصريين و الامريكيين ...و الحال اتعكس ...الجميعة بقت لوبى ضغط لامريكا على مصر مش العكس
6- فى الكورة , نفتكر رجال الاعمال و دعمهم للنوادى فى كل مشاكلهم , دا غير ان عدد مشجعين النادى الكبير لوبى لوحده بيدافع عن النادى و لو غلطان ....نفتكر برضه ازاى جوزيف بلاتر رئيس الفيفا بينجح كل انتخابات بالرغم من شبهات الفساد اللى تقريبا بقت مؤكدة و تقاضى رشاوى من قطر عشان كأس العالم يتعمل على اراضيها لكن ضمن النجاح بانه ظبت اصوات قارة افريقيا و بعض اسيا فى الفيفا و دول عددا كتير و خبرتهم قليلة و سمعتهم مش فوق الشبهات ...فبقوا ضمان ليه للنجاح فى اى انتخابات
7- فى لوبى عجيب ابتدى يظهر ..اللوبى الهندى ...الهنود بعددهم الضخم و سفرهم لدول كتير و استقرارهم فيها و عملهم فى كل الوظائف و تمسكهم و بأسلوب حياتهم الجذاب للغربيين بقوا جماعة ضغط زى الايطاليين زمان....و لو حد شاف زيارة نياندرا مودى رئيس وزراء الهند لامريكا و شاف اعداد الهنود اللى راحت تستقبله و مدى الحفاوى اللى اتقابل بيها فى امريكا ....تحس ان اوباما اللى كان جاى زيارى لمودى مش العكس ....و دا انعكس على اوباما و هو بيرد الزيارة فى نيودلهى ...كانت العروض الامريكية كلها سخية و فى رغبة شديدة فى فتح الاسواق الهندية للبضائع الامريكية و العكس طبعا ...و مش فى امريكا بس الهنود بترابطهم و تفضيلهم اولاد بلدهم فى الوظائف بقوا قوة ضخمة فى الخليج لا يستهان بيها و شوفنا تدخل البحرية الهندية فى اجلاء الرعايا الهنود بالكامل من اليمن و التسهيلات البحرية اللى الهند واخداها فى سلطنة عمان اللى عمالتها من اغلبية هندية ...الهند بقت تلعب سياسة بالمهاجرين بتوعها
8- على ذكر الخليج , دول الخليج لوبى قائم بذاته , بس لوبى غير محبوب لانه بيوجه الراى الغربى بأستخدام العصا فقط , مش الجزرة كمان ....القوة الغاشمة للبترول مش القوة الناعمة للتأثير الثقافى ...رغم ان الامارات خرجت عن الاسلوب دا فى انها بقت تستغل الاقتصاد و الابهار و الدعاية لدبى و غيرها فى الغرب فى جذب تعاطف الحكومات و حب الشعوب ...بس تظل السياسات الخليجية بتستخدم كارت ضغط واحد لو ضاع تأثيرهم يضيع (اعملوا اللى على مزاجنا و الا حنقطع عنكم البترول ) .
و دا مش ند طبعا للوبى الاسرائيلى اللى بيلعب بكل الكروت (الديموقراطية - محاربة الارهاب - التقدم العلمى - التسهيلات العسكرية - الاعلام )
9- اما عن ليه مفيش لوبى ضغط مصرى بالرغم من كترة عدد المهاجرين المصريين و كثرة اصحاب الاموال منهم
احنا شوفنا امثلة متنوعة للوبى الناجح ...بس الاسرائليين , الهنود , الايطاليين اتفقوا فى كذا نقطة اولها حبهم و انتماءهم بلدهم بالرغم من الهجرة و بعد المسافة والتانية التغلغل داخل المجتمع الغربى و التأثير فى المواطنين هناك بأستخدام ثقافتهم المميزة اللى منسيوهاش ...الاكل الهندى و الايطالى حتى بقى محبب الامريكان جدا ...و بالتالى بقوا مواطنين مزدوجين معاهم الحقوق و المميزات الامريكية و معاه الهوية و الثقافة بتاعة دولته ....و اشتغلوا لمصلحة بلدهم الام على احسن ما يكون
هل المصريين فى الخارج عملوا كده ؟؟؟ ...
طب هل ناويين يعملوا كده ؟؟؟
الاجابة : مفيش اختيارات كتير
يا يبقول لوبى يُحترم و درع بره يصد عن بلدهم
يا يبقوا مجرد جالية تايهة فاقدة الهوية زيها زى الالاف الجاليات فى المهجر
هم اللى حيختاروا
وشكرا
